తెలంగాణలో భారీగా పెరిగిన కరోనా కేసులు.. గవర్నర్ తమిళిసై ‘వార్నింగ్’ ట్వీట్

తెలంగాణ రాష్ట్రంలో కరోనా వైరస్ కేసులు పెరుగుతుండటం పట్ల గవర్నర్ తమిళిసై సౌందరరాజన్ ఆందోళన వ్యక్తం చేశారు. కరోనా కట్టడికి రాష్ట్ర ప్రభుత్వం అనేక చర్యలు తీసుకుంటున్నా.. కేసుల సంఖ్య పెరుగుతోందన్నారు. ఒకే రోజులో 199 కేసులు నమోదయ్యాయన్న ఆమె.. వీరిలో ఇద్దరు మెడికోలు కూడా ఉన్నారని తెలిపారు. కరోనాను తరిమేయడానికి అందరం కలిసి పోరాటం చేద్దామని ఆమె పిలుపునిచ్చారు.

ఒకే రోజులో కేసులు భారీగా నమోదు కావడం పట్ల భయాందోళనలు అవసరం లేదన్న గవర్నర్.. కాకపోతే ఇది హెచ్చరికే అన్నారు. మనమంతా జాగ్రత్తగా, అప్రమత్తంగా ఉండాలన్నారు. లాక్‌డౌన్ ఆంక్షలను సడలించారంటే దాని అర్థం జాగ్రత్త చర్యల విషయంలో సడలింపు ఇచ్చినట్లు కాదని గవర్నర్ తెలిపారు. మనం అన్‌లాక్ 1 దిశగా వెళ్తున్నాం.. లాక్‌డౌన్ 5 రిలాక్సేషన్ వైరస్‌కు కాదు విలువలకు అని సౌందర రాజన్ స్పష్టం చేశారు.

తెలంగాణలో మొత్తం కరోనా కేసుల సంఖ్య 2689కి చేరింది. వీటిలో 2264 కేసులు స్థానికంగా నమోదైనవి కాగా.. విదేశాలు, వలస కార్మికుల వల్ల మిగతా కేసులు నమోదయ్యాయని ప్రభుత్వం తెలిపింది. రాష్ట్రంలో ఇప్పటి వరకూ కోవిడ్ బారిన పడి 82 మంది ప్రాణాలు కోల్పోయారు.