ఫ్రిడ్జ్‌లో బూజుపట్టిన మేక మాంసం.. హైదరాబాద్‌లో మటన్ షాపుల దారుణాలు

లాక్ డౌన్ అమలవుతున్న వేళ మాంసం ధరలు విపరీతంగా పెరిగిపోవడంతో ప్రభుత్వం కొద్ది రోజుల క్రితం కీలక ఆదేశాలు జారీ చేసిన సంగతి తెలిసిందే. మటన్ షాప్‌లో కల్తీ మాంసం అమ్మినా లేక ఎక్కువ ధరకు అమ్మినా కఠిన చర్యలు ఉంటాయని గతంలోనే ప్రభుత్వం హెచ్చరించింది. గతంలోనూ సోదాలు జరిపి హైదరాబాదులో చాలా వరకు దుకాణాలను అధికారులు సీజ్ చేశారు. నిర్వహకులపై కఠిన చర్యలూ తీసుకున్నారు. ఈ క్రమంలో హైదరాబాదులో ఉన్న ఏ-వన్ అనే మటన్ షాప్‌ను నిబంధనలు పాటించనందున శనివారం అధికారులు దాడి చేసి సీజ్ చేశారు.

హైదరాబాద్ పంజాగుట్టలోని మటన్ షాప్ నిర్వహకులు మటన్‌ని ఫ్రిడ్జ్‌లో ఉంచి నిల్వ ఉంచుతున్నారు. అలా ఉంచిన మాంసాన్ని నిబంధనలకు విరుద్ధంగా ఎక్కువ ధరకు కూడా అమ్ముతూ ఉన్నట్లు జీహెచ్ఎంసీ అధికారులకు సమాచారం అందింది. దీంతో అధికారులు దాడులు చేసి ఆ మటన్ షాప్‌లో సోదాలు చేశారు. రెండు మూడు రోజులపాటు మటన్‌ను ఫ్రిడ్జ్‌లో పెట్టి వినియోగదారులకు అమ్ముతున్నట్టు గుర్తించారు. నిబంధనలు పాటించనందున దుకాణాన్ని సీజ్ చేశారు. పశుసంవర్థక శాఖ, టాస్క్ ఫోర్స్ పోలీసులు కలిసి ఈ తనిఖీలు చేస్తున్నారు.

ధరల విషయంలోనూ కిలో మటన్‌ రూ.700కు మించి విక్రయించకూడదంటే చాలా చోట్ల రూ.900 నుంచి రూ.1000 వరకు అమ్ముతున్నారు. చికెన్‌ రూ.257లకు అమ్మాలని నిర్ణయిస్తే రూ.270, రూ.290కు అమ్ముతున్నారు.

Also Read: undefined