గుజరాత్ ప్రభుత్వం ఉత్తర్వులు వెనక్కి తీసుకోవాలి: కల్వకుంట్ల కవిత

Kalvakuntla Kavitha: బిల్కిస్ బానో అత్యాచార కేసు దోషులను విడుదల చేసిన వ్యవహారంలో.. సుప్రీం కోర్టు జోక్యం చేసుకోవాలని టీఆర్ఎస్ ఎమ్మెల్సీ కల్వకుంట్ల కవిత కోరారు. దోషులను విడుదల చేస్తూ.. గుజరాత్ ప్రభుత్వం (Gujarat govt) జారీ చేసిన ఉత్తర్వులను వెనక్కి తీసుకోవాలని డిమాండ్ చేశారు. రేపిస్టులకు స్వాగతం చెప్పడం సమాజానికి చేటు అని వ్యాఖ్యానించారు. ఇలాంటి పరంపర మొదలు కాకముందే.. ఈ సాంప్రదాయాన్ని ఆపాల్సిన అవసరం ఉందని కవిత వ్యాఖ్యానించారు.రేపిస్టులు, హత్య చేసిన వాళ్లు జైలు నుంచి విడుదల అయిన తర్వాత.. ఒక సిద్దాంతాన్ని పాటించే వాళ్లు కొంతమంది స్వాగతం చెప్పడం సమాజానికి ప్రమాదకరమని ఎమ్మెల్సీ కవిత ఆందోళన వ్యక్తం చేశారు. ఆగస్టు 15న బిల్కిస్ బానో (Bilkis Bano) అత్యాచార కేసులో జీవిత ఖైదు అనుభవిస్తున్న 11 మంది దోషులను విడుదల చేస్తూ.. గుజరాత్ ప్రభుత్వం ఉత్తర్వులు జారీ చేసింది. జైలు నుంచి బయటకు వచ్చిన ఖైదీలకు.. కొందరు మిఠాయిలు తినిపిస్తూ.. పూలదండలతో స్వాగతం చెప్పినట్లు వార్తలు వచ్చాయి. ఈ నేపథ్యంలో ఎమ్మెల్సీ కవిత దీనిపై ఘాటుగా స్పందించారు.

ఈ వ్యవహారంలో సుప్రీంకోర్టు జోక్యం చేసుకొని.. తక్షణమే చర్యలు తీసుకోవాలని విజ్ఞప్తి కవిత చేశారు. పౌరులకు చట్టంపై విశ్వాసం సన్నగిల్లకుండా ఉండడానికి.. నిర్భయ వంటి ఉదంతాలు పునరావృతం కాకుండా చేయడానికి.. చర్యలు తీసుకోవాలని విజ్ఞప్తి చేశారు.