ఆ బాధ్యత నాదే .. ఓటమిపై హరీష్ రావు ఆసక్తికర వ్యాఖ్యలు

దుబ్బాక ఉప ఎన్నికలో జరిగిన హోరా హోరి పోరులో బీజేపీని విజయం వరించింది. అనూహ్యంగా అతి స్వల్ప ఓట్ల తేడాతో టీఆర్ఎస్ ఓటమి పాలయ్యింది. దుబ్బాక ఓటమిపై మంత్రి హరీష్ రావు స్పందించారు. ఉపఎన్నికలో టీఆర్ఎస్ అభ్యర్థి ఓటమికి తనదే బాధ్యత అన్నారు. దుబ్బాక ప్రజాతీర్పును శిరసావహిస్తామన్నారు హరీష్. ఓటమికి గల కారణాలు సమీక్షించుకొని లోపాలను సరిదిద్దుకుంటామని హరీశ్‌రావు చెప్పారు. దుబ్బాక ప్రజలకు ఎల్లప్పుడూ అందుబాటులో ఉంటానన్నారు.

సీఎం కేసీఆర్ నేతృత్వంలో దుబ్బాక నియోజకవర్గ అభివృద్ధికి సహకరిస్తానని హరీశ్‌రావు హామీ ఇచ్చారు. టీఆర్‌ఎస్‌కు ఓటేసిన దుబ్బాక ప్రజలకూ, ఎన్నికల్లో కష్టపడిన ప్రతి ఒక్క కార్యకర్తకు హరీశ్ రావు కృతజ్ఞతలు తెలిపారు. దుబ్బాక ఉపఎన్నిక కోసం మంత్రి హరీశ్ రావు చాలా కృషి చేశారు. ఎన్నికల నోటిఫికేషన్ వచ్చినప్పటి నుంచి ఉపఎన్నిక జరిగిన వరకూ దుబ్బాకలో అన్ని తానై నడిపంచారు. టీఆర్ఎస్ అభ్యర్థి సోలిపేట సుజాతను గెలిపించేందుకు శాయశక్తులా ప్రయత్నించారు. కానీ విజయం మాత్రం బీజేపీ అభ్యర్థి రఘునందన్ రావును వరించింది.

Read More: Harish Rao: హరీష్ రావు తొలి ఓటమి.. ట్రబుల్‌లో ట్రుబుల్ షూటర్

టీఆర్ఎస్ అభ్యర్థి సుజాతపై 1470 ఓట్ల మెజార్టీతో రఘునందన్‌రావు గెలుపొందారు. తొలి రౌండ్ నుంచి కమలం-కారు మధ్య హోరాహోరీగా.. నువ్వానేనా అన్నట్టుగా సాగినా చివరాకరికి కమలాన్నే విజయం వరించింది. టీఆర్ఎస్ అభ్యర్థి సోలిపేట రామలింగారెడ్డి మృతి చెందడంతో దుబ్బాక శాసనసభ నియోజకవర్గానికి ఉప ఎన్నికలు వచ్చాయి. ఈ ఉప ఎన్నికల్లో అధికార పార్టీ తరపున రామలింగారెడ్డి సతీమణి సోలిపేట సుజాతకు టీఆర్ఎస్ టికెట్ ఇచ్చింది. బీజేపీ తరపున రఘునందన్ రావు బరిలో నిలిచారు. ఇక కాంగ్రెస్ తరపున చెరుకు శ్రీనివాస్ రెడ్డి పోటీ చేశారు