కాబోయే సీఎం కేటీఆర్.. ఈటల రాజేందర్ ఆసక్తికర వ్యాఖ్యలు

త్వరలోనే తెలంగాణ సీఎంగా కేటీఆర్ ప్రమాణ స్వీకారం చేస్తారని ప్రచారం జరుగుతున్న వేళ.. ఆరోగ్య శాఖ మంత్రి, టీఆర్ఎస్ కీలక నేత ఈటల రాజేందర్ ఆసక్తికర వ్యాఖ్యలు చేశారు. త్వరలోనే తెలంగాణ సీఎం మార్పు ఉంటే ఉండొచ్చంటూ.. కేటీఆర్‌కు ముఖ్యమంత్రి పగ్గాలు అప్పగించే విషయమై ఆయన సంకేతాలిచ్చారు. సీఎం మారడంలో తప్పేముందని ఆయన ప్రశ్నించారు. కరోనా టీకా ప్రారంభోత్సవంలో కేసీఆర్ పాల్గొనకపోవడంపై విమర్శలు వస్తుండటం పట్ల ఆయన స్పందించారు. మా దగ్గర 99 శాతం కార్యక్రమాల్లో కేటీఆరే పాల్గొంటారని ఈటల తెలిపారు.

కేసీఆర్‌కు, తనకు మధ్య దూరం పెరగలేదన్న ఈటల.. తాను ఇటీవల సైలెంట్ అయ్యాననడాన్ని కొట్టి పారేశారు. ప్రతిపక్షంలో ఉన్నప్పుడు ప్రజల కోసం పోరాటంలో భాగంగా ఎక్కువ మాట్లాడాల్సి వచ్చేదని.. ఇప్పుడు మాటల కంటే చేతలకు అధిక ప్రాధాన్యం ఇస్తున్నామన్నారు. గతంలో గులాబీ పార్టీ మేం కూడా ఓనర్లమేనంటూ ఈటల వ్యాఖ్యానించిన సంగతి విదితమే.

ఆయుష్మాన్‌ భారత్‌ కంటే ఆరోగ్యశ్రీ పథకమే బాగుంటుందని భావిస్తున్నానని ఈటల మరోసారి వెల్లడించారు. రాష్ట్రంలో 75 లక్షల కుటుంబాలకు ఉపయోగపడి.. ఏటా రూ.1200 కోట్లు ఖర్చు పెట్టే ఆరోగ్యశ్రీ పథకం గొప్పదా? 26 లక్షల కుటుంబాలకు ఉపయోగపడి.. ఏటా రూ.200 కోట్లు ఖర్చు పెట్టే ఆయుష్మాన్‌ భారత్‌ పథకం గొప్పదా? అని మంత్రి ప్రశ్నించారు.