Telangana Rain: మరో 3 రోజుల పాటు అతి భారీ వర్షాలు

Hyderabad weather updates: తెలంగాణలో ఇప్పటికే వానలు దంచికొడుతుండగా.. వాతావరణ కేంద్రం పిడుగు లాంటి వార్త చెప్పింది. రాష్ట్రంలో రానున్న 3 రోజుల పాటు భారీ నుంచి అతి భారీ వర్షాలు కురిసే అవకాశం ఉందని తెలిపింది. వర్షాలతో పాటు గంటకు 30 కి.మీ. నుంచి 40 కి.మీ వేగంతో ఈదురుగాలులు వీచే అవకాశం ఉందని హైదరాబాద్ వాతావరణ కేంద్రం డైరెక్టర్ డా. నాగరత్న తెలిపారు. ఉరుములు, మెరుపులతో కూడిన వర్షం పడే అవకాశం ఉందని వెల్లడించారు.

Authored byశ్రీనివాస్ గంగం | Samayam Telugu 11 Sep 2022, 10:24 am

తెలంగాణలో ఇప్పటికే వానలు (Telangana Rain) దంచికొడుతుండగా.. వాతావరణ కేంద్రం మరో పిడుగు లాంటి వార్త చెప్పింది. రాష్ట్రంలో రాగల మూడు రోజుల పాటు భారీ నుంచి అతి భారీ వర్షాలు కురిసే అవకాశం ఉందని తెలిపింది. వర్షాలతో పాటు గంటకు 30 కి.మీ. నుంచి 40 కి.మీ వేగంతో ఈదురుగాలులు వీచే అవకాశం ఉందని హైదరాబాద్ వాతావరణ కేంద్రం డైరెక్టర్ డాక్టర్‌ నాగరత్న తెలిపారు. ఉరుములు, మెరుపులతో కూడిన వర్షం పడే అవకాశం ఉందని వెల్లడించారు.

వాయవ్య బంగాళాఖాతంలో ఏర్పడిన తీవ్ర అల్పపీడనం అలాగే కొనసాగుతుండగా.. దీనికి అనుబంధంగా ఉన్న ఆవర్తనం సగటు సముద్ర మట్టం నుంచి మధ్య ట్రోపోస్పిరిక్‌ స్థాయి వరకు విస్తరించి ఉందని డాక్టర్ నాగరత్న తెలిపారు. రానున్న 24 గంటల్లో ఇది వాయుగుండంగా బలపడి దక్షిణ ఒడిశా - ఉత్తర ఆంధ్రప్రదేశ్‌ తీరాలకు దగ్గరలోని వాయవ్య దిశగా ఉన్న పశ్చిమ మధ్య బంగాళాఖాతం తీరానికి చేరుకునే అవకాశం ఉందని చెప్పారు. దీని ప్రభావంతో ఏపీ, తెలంగాణ రాష్ట్రాల్లో భారీ వర్షాలు కురిసే అవకాశం ఉందని ఒక ప్రకటనలో తెలిపారు.

హైదరాబాద్ సహా రాష్ట్రంలోని పలు ప్రాంతాల్లో ఇప్పటికే భారీ వర్షాలు కురుస్తున్నాయి. గత నాలుగు రోజులుగా కురుస్తున్న వర్షాలతో హైదరాబాద్ నగర శివార్లలోని హిమాయత్ సాగర్, ఉస్మాన్ సాగర్ జంట జలాశయాలకు భారీగా వరద పోటెత్తింది. అధికారులు గేట్లు తెరిచి నీటిని దిగువకు విడుదల చేస్తున్నారు. దీంతో మూసీలోకి వరద ప్రవాహం పెరిగింది. వర్షాలు ఇలాగే కొనసాగితే నగరంలోని పలు ప్రాంతాలు ముంపు బారిన పడే ముప్పు ఉంది.

అటు.. కరీంనగర్, మంచిర్యాల, నిర్మల్, నిజామాబాద్, సిద్దిపేట, రాజన్న సిరిసిల్ల, యాదాద్రి భువనగిరి, వరంగల్, నల్గొండ తదితర జిల్లాల్లో వర్షాలు కురుస్తున్నాయి. పలు చోట్ల పిడుగులు పడుతున్నాయి.

Telangana Rain: మరో 3 రోజుల పాటు అతి భారీ వర్షాలు

తరవాత కథనం