హైదరాబాద్‌లో కొనసాగుతున్న వర్షం బీభత్సం.. పలు ప్రాంతాల్లో కుండపోత

హైదరాబాద్‌లో వర్షం బీభత్సం కొనసాగుతోంది. నగరంలో గత కొన్ని రోజులుగా భారీ వర్షాలు కురుస్తుండగా.. మంగళవారం (అక్టోబర్ 8) సాయంత్రం మరోసారి కుండపోత వాన కురిసింది. దీంతో లోతట్టు ప్రాంతాలన్నీ జలమయం అయ్యాయి. ఆయా ప్రాంతాల్లో పలు ఇళ్లలోకి వరద నీరు చేరడంతో ప్రజలు తీవ్ర ఇబ్బందులు పడుతున్నారు. రోడ్లన్నీ చెరువులను తలపిస్తున్నాయి. నాలాలు పొంగి పొర్లుతున్నాయి.

జూబ్లీహిల్స్, బంజారాహిల్స్, అమీర్‌పేట, పంజాగుట్ట, బోరబండ, ఎస్సార్ నగర్, ఖైరతాబాద్, ఆర్టీసీ క్రాస్ రోడ్స్ తదితర ప్రాంతాల్లో భారీ వర్షం కురిసింది. మంగళవారం సాయంత్రం నుంచి పలు దఫాలుగా వాన కురుస్తోంది.

Also Read: అఖిలప్రియ భర్తపై ఎస్‌ఐ ఫిర్యాదు.. హైదరాబాద్‌లో కేసు

భారీ వర్షాల నేపథ్యంలో జీహెచ్‌ఎంసీ అప్రమత్తమైంది. రోడ్లపై నిలిచిన వాన నీటిని పంపించడానికి సిబ్బంది శ్రమిస్తున్నారు. పలుచోట్ల మ్యాన్‌హోళ్ల మూతలు తెరిచి వరద నీటిని పంపిస్తున్నారు. ఈ నేపథ్యంలో పాదచారులు బిక్కుబిక్కుమంటున్నారు.

భాగ్యనగరంలో బుధవారం కూడా భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. ఈ నేపథ్యంలో జీహెచ్‌ఎంసీ సిబ్బందిని అప్రమత్తం చేసినట్లు కమిషనర్ లోకేశ్ కుమార్ తెలిపారు. దెబ్బతిన్న రోడ్లకు యుద్ధప్రాతిపదికన మరమ్మతులు చేస్తున్నట్లు వెల్లడించారు.