Rains In Telangana 2022: తెలంగాణకు ఎల్లో అలెర్ట్.. ఆ జిల్లాల్లో భారీ వర్షాలు

నైరుతి రుతుపవనాల ప్రభావంతో శనివారం తెలంగాణ, ఏపీలోని పలు జిల్లాల్లో వర్షాలు కురిశాయి. కొన్ని చోట్ల తేలికపాటి జల్లులు కురవగా, మరికొన్ని చోట్ల ఓ మోస్తరు వర్షాలు పడ్డాయి. రానున్న రెండు, మూడ్రోజులు కూడా తెలంగాణ, ఏపీలోని కోస్తాంధ్ర, రాయలసీమ జిల్లాల్లోని పలు ప్రాంతాల్లో వర్షాలు కురవనున్నాయి.

తెలంగాణలో ఆదివారం భారీ వర్షాలు కురిసే అవకాశముందని హైదరాబాద్‌ వాతావరణ కేంద్రం తాజాగా తెలిపింది. ఆదిలాబాద్‌, కుమ్రంభీం ఆసిఫాబాద్‌, మంచిర్యాల, నిర్మల్‌, జగిత్యాల, రాజన్న సిరిసిల్ల, కరీంనగర్‌, పెద్దపల్లి, నిజామాబాద్‌, జయశంకర్‌ భూపాలపల్లి, ములుగు జిల్లాల్లో భారీ వర్షాలు పడతాయని వెల్లడించింది. కొన్ని జిల్లాల్లో ఉరుములు, మెరుపులతో కూడిన వర్షాలు పడతాయని వాతావరణ శాఖ అంచనా వేసింది. సోమవారం కూడా ఉరుములు, మెరుపులతో కూడిన వర్షాలు కురవచ్చని వివరించింది. మంగళ, బుధ, గురువారాల్లో తేలికపాటి నుంచి మోస్తరు వర్షాలు పడవచ్చని తెలిపింది. వర్షాల నేపథ్యంలో వాతావరణ కేంద్రం ఎల్లో అలర్ట్ జారీ చేసింది.