ఫ్లైఓవర్ ప్రమాదం: కృష్ణమిలాన్ రావు అరెస్ట్‌పై జనవరి 3వరకు స్టే

బయో డైవర్సిటీ ఫ్లైఓవర్ ప్రమాదంలో కారు ఓనర్, వీడియో గేమ్స్ సంస్థ సీఈవో కల్వకుంట్ల కృష్ణమిలాన్ రావు అరెస్టుపై హైకోర్టు స్టే విధించింది. జనవరి 3 వరకు ఆయణ్ని అదుపులోకి తీసుకోవద్దని తెలంగాణ పోలీసులకు స్పష్టం చేసింది. హైదరాబాద్‌లో సంచలనం సృష్టించిన ఈ ఘటనపై హైకోర్టులో గురువారం (డిసెంబర్ 12) విచారణ జరిగింది. యాక్సిడెంట్ చేసిన వ్యక్తిపై సెక్షన్ 304 (2) కింద ఎలా కేసు పెడతారని ఈ సందర్భంగా పోలీసులను హైకోర్టు ప్రశ్నించింది.

కృష్ణమిలాన్ రావు తరఫు న్యాయవాది ఇప్పటికే రోడ్డు ప్రమాదంపై కోర్టులో వాదనలు వినిపించారు. ప్రమాద సమయంలో ఆయన 40 kmph వేగంతోనే కారు నడుపుతున్నారని.. ప్రమాదానికి ఫ్లైఓవర్ డిజైనే కారణమని వాదించారు. వంతెనపై ‘ఎస్’ ఆకారంలో రెండు ప్రమాదకర మలుపులు ఉన్నాయని.. ఈ మలుపు కారణంగానే ఘటన జరిగిందని వివరించారు. ఫ్లైఓవర్‌పై ఇంతకుముందు కూడా ఇద్దరు మృతి చెందారని.. దానికి కారణం డిజైన్‌‌లో లోపమేనని వాదించారు.

Also Read: వీడియో గేమ్స్ సంస్థ సీఈవో.. అదే తీరున డ్రైవింగ్, ఇప్పుడు తిరకాసు

మరోవైపు.. ప్రమాద సమయంలో కృష్ణమిలన్ రావు నడుపుతున్న వోక్స్‌వ్యాగన్ పోలో కారు 104 kmph వేగంతో ఉందని పోలీసులు వివరాలు సమర్పించారు. ఇరుపక్షాల వాదనలు విన్న హైకోర్టు ప్రమాద సమయంలో కారును నడిపిన కృష్ణమిలాన్ రావు అరెస్ట్‌పై జనవరి 3వరకు స్టే విధించింది. అప్పటి వరకు ఆయణ్ని అరెస్ట్ చేయకూడదని ఆదేశాలు జారీ చేసింది. తదుపరి విచారణను జనవరి 3కు వాయిదా వేసింది.

నగరంలో కొత్తగా అందుబాటులోకి వచ్చిన బయోడైవర్సిటీ ఫ్లైఓవర్‌పై నవంబర్ 23న ఈ ఘోర దుర్ఘటన జరిగింది. అతివేగంతో దూసుకొచ్చిన కారు వంతెన రెయిలింగ్‌ను తాకి, అమాంతం ఎగిరి కింద పడింది. ఆ సమయంలో రోడ్డుపై నిల్చొని ఆటో కోసం వేచి చూస్తున్న సత్యవాణి అనే మహిళపై ఆ కారు పడటంతో ఆమె అక్కడికక్కడే ప్రాణాలు విడిచారు. ప్రమాదంలో మరో ఆరుగురు గాయపడ్డారు. కారు నడుపుతున్న కృష్ణమిలాన్ రావు సీటు బెల్టు పెట్టుకోవడంతో గాయాలతో బయటపడ్డారు.

Also Read: హాజీపూర్ కిల్లర్‌కు ఉరి శిక్ష ఖాయమా.. విచారణ చివరి దశకు