హైసెక్యూరిటీ మధ్య ప్రధాని హైదరాబాద్ టూర్.. ఎస్పీజీతో కలిసి ఏర్పాట్లను పర్యవేక్షిస్తున్న పోలీసులు

జులై 2, 3 తేదీల్లో హైదరాబాద్‌లో జరగనున్న బీజేపీ జాతీయ కార్యవర్గ సమావేశాలకు హైటెక్స్ వేదికగా మారనుంది. ఈ సమావేశాల సందర్భంగా ప్రధాని నరేంద్ర మోదీతో పాటు 40 మంది కేంద్ర ప్రముఖులు, వివిధ రాష్ట్రాల ముఖ్యమంత్రులు, వందలాది మంది పార్టీ నాయకులు ఇక్కడే బస చేయనున్నారు. వీరందరి భద్రత విషయంలో తెలంగాణ పోలీసులు తలమునకలయ్యారు. వారు రెండ్రోజులు బస చేయనుండటంతో భద్రతను సవాల్‌గా తీసుకుంటున్నారు. ఎక్కడా ఏ చిన్న పొరపాటుకూ తావులేకుండా పటిష్ట భద్రతా ఏర్పాట్లు చేయడంలో రాష్ట్ర పోలీసు శాఖ నిమగ్నమైంది.

ప్రధాని, ఇతర ప్రముఖుల భద్రతను చూసే స్పెషల్ ప్రొటెక్షన్ గ్రూప్ (ఎస్పీజీ) అధికారులు ఇప్పటికే హైదరాబాద్‌కు చేరుకున్నారు. ఈ క్రమంలోనే రాష్ట్ర పోలీసు అధికారులు వారితో సంప్రదింపులు జరుపుతున్నారు. జాతీయ కార్యవర్గ సమావేశాల అనంతరం ప్రధాని మోదీ ప్రొటోకాల్ ప్రకారం రాజ్ భవన్‌లో బస చేయాల్సి ఉంది. ఈ నేపథ్యంలోనే తెలంగాణ పోలీసులు ఆందోళన వ్యక్తం చేస్తున్నారు. రాజ్ భవన్‌లో బస చేస్తే భద్రత సమస్యలు తలెత్తే అవకాశం ఉందని ఎస్పీజీకి సమాచారం ఇచ్చారు. అగ్నిపథ్, కాంగ్రెస్ అగ్ర నేతలపై ఈడీ విచారణ నేపథ్యంలో నగరానికి మధ్యలో రాజ్ భవన్‌లో ప్రధాని బస చేస్తే నిరసనలు వ్యక్తమయ్యే అవకాశాలున్నాయని పోలీసులు భావిస్తున్నారు. దీంతో రాజ్ భవన్‌లో బసపై పునరాలోచించాలని ఎస్పీజీని రాష్ట్ర పోలీసు శాఖ కోరారు.

మరోవైపు బీజేపీ ప్రముఖులంతా ఒకే వేదికపైకి వస్తుంటడంతో మావోల విషయంలోనూ పోలీసు అధికారులు అప్రమత్తమయ్యారు. ఎవరైనా అనుమానితులు సభా ప్రాంగణంలోకి ప్రవేశించారా? అనేది పసిగట్టేందుకు స్పెషల్ టీమ్‌ను రంగంలోకి దింపనున్నారు. మావోయిస్టులను గుర్తించడంలో అనుభవమున్న అధికారులను జిల్లాల నుంచి రప్పిస్తున్నారు. వీరంతా సమావేశ ప్రాంగణం, నాయకులు విడిది చేస్తున్న చోట్ల ఉండి అనుమానితులపై దృష్టి సారించనున్నారు.