హైదరాబాద్ కార్ యాక్సిడెంట్: ‘కారు వేగానికి షివరింగ్ వచ్చింది.. ’

హైదరాబాద్ నగరంలో ఘోర రోడ్డు ప్రమాదం చోటు చేసుకుంది. గచ్చిబౌలి సమీపంలోని బయో డైవర్సిటీ ఫ్లై ఓవర్ పై నుంచి కారు పల్టీకొట్టింది. వేగంగా దూసుకొచ్చిన కారు ఫ్లై ఓవర్‌ను ఢీ కొట్టి ఒక్కసారిగా గాల్లోకి లేచి కింద రోడ్డుపై పడిపోయింది. ఈ దుర్ఘటనలో ఓ మహిళ అక్కడికక్కడే మృతి చెందింది. మరో తొమ్మిది మందికి గాయాలయ్యాయి. గాల్లో నుంచి కారు పడిపోవడంతో రోడ్డుపై వేచి చూస్తున్న వారు భయాందోళనకు గురయ్యారు. ఏం జరిగిందో అర్థంకాక భయంతో పరుగులు తీశారు.

ఓవర్ స్పీడ్ కారణంగానే ప్రమాదం జరిగిందని.. తమ కళ్లముందే కారు అతివేగంతో దూసుకుపోయి పల్టీకొట్టిందని ప్రత్యక్ష సాక్షి ఒకరు చెప్పారు. తాము హైటెక్ సిటీ వైపు వెళ్లేందుకు బయోడైవర్సీటీ ఫ్లై ఓవర్ వైపు వచ్చామని.. ఫ్లై ఓవర్ ఎక్కే సమయంలో ఓ కారు తమను దాటి అతివేగంతో దూసుకెళ్లిందన్నారు. కారు వెళ్లిన వేగానికి బైక్‌పై ఉన్న తమకు వణుకు(షివరింగ్) వచ్చిందన్నారు.

Also Read: హైదరాబాద్‌లో ఘోర ప్రమాదం.. ఫ్లై ఓవర్‌పై నుంచి కిందపడ్డ కారు

కారు ఫ్లై ఓవర్ ఎక్కే సమయంలో వేగంగా దూసుకురావడంతో మరో బైక్‌పై ఉన్న వ్యక్తి కిందపడిపోయారని తెలిపారు. అయితే ఆయనకు కారు తగిలిందో లేదో తెలియదని.. కాకపోతే పక్కనుంచి దూసుకెళ్లడంతో కంగారు పడి కిందపడిపోయి ఉండొచ్చన్నారు. తాము అతనిని పైకి లేపేందుకు దగ్గరికి వెళ్తుండగా తానే లేచి నిలబడ్డారని చెప్పారు. వేగంగా వెళ్లిన కారు తమ ముందే పల్టీకొట్టిందన్నారు.

ఫ్లై ఓవర్‌పై చాలా ప్రమాదకరమైన మలుపు ఉందని.. దానిని గమనించకుండా వేగంగా వెళ్లడమే ప్రమాదానికి కారణమని చెప్పారు. మలుపు వద్దకు వెళ్లగానే ఒక్కసారిగా బ్రేక్ కొట్టడంతో కారు ఒక్కసారిగా గాల్లోకి లేచి కిందపడిపోయిందని తెలిపారు. అక్కడ 80 కిలోమీటర్లు వేగంతో వెళ్లడం కూడా కష్టమేనని.. అయితే ఆ కారు అంతకన్నా ఎక్కువ వేగంతోనే ఉందని అభిప్రాయపడ్డారు.