హైదరాబాదీలకు అలెర్ట్: కీలక ఆఫీసు అడ్రస్ మారింది.. కొత్త ప్రాంగణంలో కార్యకలాపాలు

హైదరాబాద్‌ మెట్రోపాలిటన్ డెవలప్‌మెంట్ అథారిటీ ఆఫీసు ఇప్పటి వరకూ తార్నాకలోని డిస్ట్రిక్ కమర్షియల్ కాంప్లెక్స్‌లో కార్యకలాపాలు కొనసాగించగా.. దాన్ని అమీర్‌పేటకు షిఫ్ట్ చేశారు. ఇక నుంచి స్వర్ణజయంతి కాంప్లెక్స్‌లోని రెండు, నాలుగు, ఐదు, ఏడో అంతస్థుల్లో హెచ్ఎండీ కార్యకలాపాలు నిర్వహిస్తున్నారు. నేటి (ఆగష్టు 3) నుంచి హెచ్ఎండీలోని అన్ని విభాగాలు అమీర్‌పేటలో కార్యకలాపాలు ప్రారంభించాయి.

హెచ్ఎండీఏ వెబ్‌సైట్, మెయిల్ ఐడీ, ట్విట్టర్ లాంటి సోషల్ మీడియా అకౌంట్లలో ఎలాంటి మార్పులు ఉండవని... అథారిటీ ఆఫీసు అడ్రస్ మైత్రివనం పక్కనున్న స్వర్ణ జయంతి కాంప్లెక్స్‌కు మారిన విషయాన్ని ప్రజలు గమనించాలని హెచ్ఎండీఏ కమిషనర్ అర్వింద్ కుమార్ తెలిపారు.

తార్నాకలో ఇదివరకు ఉన్న హెచ్ఎండీఏ ప్రాంగణం దూరంగా ఉందని, రాకపోకలకు అసౌకర్యంగా ఉందని చాలా మంది అభిప్రాయపడ్డారు. అంతే కాకుండా వివిధ విభాగాల మధ్య సమన్వయం కుదరడం లేదు. అదే సమయంలో స్వర్ణ జయంతి కాంప్లెక్స్‌లో చాలా భాగం ఖాళీగా ఉండటంతో హెచ్ఎండీఏ హెడ్ ఆఫీసును అమీర్‌పేటకు తరలించారు. స్వర్ణ జయంతి కాంప్లెక్స్ ఆధునికీకరణకు రూ.8 కోట్లు ఖర్చయ్యాయని సమాచారం.

హెచ్ఎండీఏ 1975లో ఏర్పాటైన నాటి నుంచి 2008 వరకు బేగంపేటలోని పైగా ప్యాలెస్‌లో కార్యకలాపాలు నిర్వహించారు. 2008లో పైగా ప్యాలెస్‌ను అమెరికా కన్సులేట్‌కు అప్పగించారు. తర్వాత మారేడ్‌పల్లిలోని మున్సిపల్ ఆఫీసు భవనంలోకి మార్చారు. 2010లో తార్నాకకు మార్చారు.