పోలీసులు మంచి పని చేశారు.. హోం మంత్రి అభినందనలు

కరోనా కట్టడిలో మాత్రమే మానవత్వం చూపడం కాదు మామూలు రోజుల్లో కూడా పోలీస్ శాఖ మంచితనాన్ని నిరూపించుకుంది. హైదరాబాదులో మూడు రోజులుగా కురుస్తున్న వర్షానికి తడుస్తూ బయట షాపు వద్ద పడుకుంటున్న ఒక వ్యక్తిని పోలీసులు రక్షించారు. ఈ ఘటనపై రాష్ట్ర హోంశాఖ మంత్రి మహమూద్ అలీ పోలీసులను ప్రశంసించారు. చాంద్రాయణ గుట్ట పోలీస్ స్టేషన్ పరిధిలో గత మూడు రోజులుగా వర్షంలో తడుస్తూ ఓ దుకాణం వద్ద పడిపోయిన వ్యక్తి గురించి సమాచారం తెలుసుకున్న పోలీస్ సిబ్బంది వెంటనే అక్కడికి వెళ్లి ఆయనను రక్షించారు.

ఆ వ్యక్తి తన వివరాలేమీ చెప్పలేని స్థితిలో ఉన్నారు. చాంద్రాయణగుట్ట పోలీస్ స్టేషన్‌కు చెందిన బి.మహేష్ అనే కానిస్టేబుల్, ఎం. డి సయీద్ అనే హోం గార్డ్‌లు ఆ వ్యక్తిని రక్షించేందుకు 108 వాహనానికి సమాచారం ఇచ్చారు. లేవలేని స్థితిలో ఉన్న అతణ్ని ఉస్మానియా ఆసుపత్రికి తరలించారు. వివరాల కోసం ప్రయత్నించగా తన పేరు శేఖర్ అని చెప్పగలిగాడని పోలీస్ సిబ్బంది తెలిపారు. పోలీసు సిబ్బంది శాంతిభద్రతలను కాపాడడంతో పాటు ఈ రకమైన సేవ చేయడం ద్వారా మంచి పేరు తెచ్చుకుంటున్నారని ప్రశంసించారు.