ఆటోలోనే రోగికి అత్యవసర వైద్యం.. నాగర్‌కర్నూల్‌లో దుస్థితి

ప్రభుత్వ ఆస్పత్రిలో సౌకర్యాల లేమికి అద్దం పట్టే మరో ఘటన నాగర్ కర్నూలు జిల్లాలో జరిగింది. జిల్లాలోని కల్వకుర్తి నియోజక వర్గ పరిధిలోని ఉన్న ఆమనగల్లు సర్కారీ దవాఖానాలో పడకలు ఖాళీ లేవు. ప్రస్తుతం కరోనా కేసుల వల్ల పడకలన్నీ నిండిపోయాయి. ఈ క్రమంలో ఓ వ్యక్తికి ఆరోగ్యం బాగా లేకపోవడంతో అతని కుటుంబ సభ్యులు ఆస్పత్రికి తీసుకొచ్చారు. సమయానికి వైద్యుడు కూడా అందుబాటులో లేరని బాధితులు వాపోయారు. దీంతో అత్యవసర పరిస్థితుల్లో అక్కడున్న నర్సు ఆ బాధితుడిని ఆటోలో ఉంచి చికిత్స అందించింది.

రోగికి గ్లూకోజ్ పెట్టింది. కానీ, ఆ బాటిల్‌ను పైన తగిలించేందుకు ఏ సహకారమూ లేదు. ఇక చేసేది లేక అతని కుమార్తె ఆ గ్లూకోజ్ సీసాను పైకి లేపి పట్టుకుంది. పడకలు ఖాళీగా లేవు కాబట్టి అతణ్ని కల్వకుర్తి ప్రభుత్వ ఆస్పత్రికి తీసుకెళ్లాలని నర్సు సూచించినట్లు బాధిత కుటుంబ సభ్యులు తెలిపారు. ఏమీ తోచని ఆ పేద కుటుంబం కాసేపు అక్కడే ఉండిపోయింది. ఆ తర్వాత అక్కడి నుంచి మరో ఆస్పత్రికి వెళ్లారు.

Also Read: undefined

Must Read: కరోనాతో జనం దూరం.. భర్త శవం తోపుడు బండిపై కాటికి.. భార్య అవస్థలు