మాదాపూర్‌లో రోడ్డు ప్రమాదం.. వ్యక్తి చేతిలోని మేనల్లుడి మృతి

హైదరాబాద్‌లోని మాదాపూర్‌లో విషాదం చోటు చేసుకుంది. రోడ్డు ప్రమాదంలో చిన్నారి దుర్మరణం పాలయ్యాడు. 14 నెలల బాలుడిని అతడి మేనమామ ఎత్తుకొని రోడ్డు దాటుతుండగా.. ఓ వ్యక్తి స్కూటీపై వేగంగా వచ్చి బలంగా ఢీకొట్టాడు. మేనమామ రాజ్‌కుమార్ చేతుల్లోంచి రోడ్డుపై ఎగిరిపడి ఆ బాలుడు సతీశ్ అక్కడికక్కడే మరణించాడు. మాదాపూర్‌లోని జయభేరి సిలికాన్ టవర్స్ వద్ద సోమవారం (జనవరి 6) మధ్యాహ్నం ఈ ప్రమాదం జరిగింది. ప్రమాదంలో రాజ్‌కుమార్ కూడా తీవ్రంగా గాయపడ్డాడు. అతడిని ఆస్పత్రికి తరలించి చికిత్స అందిస్తున్నారు.

రాజ్‌కుమార్ భవన నిర్మాణ కార్మికుడిగా పనిచేస్తున్నట్లు పోలీసులు గుర్తించారు. మధ్యాహ్నం భోజన విరామ సమయంలో అతడు తన మేనల్లుడుని ఎత్తుకొని రోడ్డు దాటుతుండగా మాదాపూర్ వైపు వేళ్తున్న స్కూటీ ఢీకొట్టింది. దీంతో రాజ్ కుమార్ చేతుల నుంచి చిన్నారి సతీశ్ (14 నెలలు) రోడ్డుపై ఎగిరిపడి అక్కడికక్కడే మృతి చెందాడు.

సమాచారం అందుకున్న పోలీసులు ఘటనా స్థలానికి చేరుకొని పరిశీలించారు. ఘటనపై కేసు నమోదు చేసుకున్నారు. నిందితుడిని అదుపులోకి తీసుకొని విచారిస్తున్నారు. ఘటనకు సంబంధించిన పూర్తి వివరాలు తెలియాల్సి ఉంది.

Also Read: రక్తమోడుతూ బిడ్డకు పాలు.. కంటతడి పెట్టిస్తున్న కన్నతల్లి ప్రేమ