పోలీసు ఉన్నతాధికారి లైంగిక వేధింపులు.. నిర్భయ కేసు, సస్పెన్షన్ వేటు

హైదరాబాద్‌లోని స్పెషల్ బ్రాంచ్‌లో పని చేస్తున్న ఓ పోలీసు ఇన్స్‌పెక్టర్‌పై నగర కమిషనర్ సస్పెన్షన్ వేటు వేశారు. ఓ మహిళతో అసభ్యంగా ప్రవర్తించిన కారణంగా అతనిపై సీపీ క్రమశిక్షణా చర్యలు తీసుకున్నారు. స్పెషల్‌ బ్రాంచ్‌లో ఇన్‌స్పెక్టర్‌గా చందర్‌కుమార్ పని చేస్తున్నారు. ఇటీవల ఓ మహిళ చందర్ కుమార్ తనతో అసభ్యంగా ప్రవర్తిస్తున్నాడని, వేధింపులకు గురి చేస్తున్నాడని ఫిర్యాదు చేసింది. దీంతో వెంటనే స్పందించిన సీపీ విచారణకు ఆదేశించారు. మహిళ ఫిర్యాదు మేరకు దర్యాప్తు చేపట్టారు.

ఆ మహిళ ఇన్స్‌పెక్టర్‌పై వనస్థలిపురం పీఎస్‌లో ఫిర్యాదు చేసింది. తనను చందర్ కుమార్ లైంగికంగా, మానసికంగా వేధించారని ఆ మహిళ ఫిర్యాదులో పేర్కొంది. వరంగల్‌లో పనిచేస్తున్న ప్రభుత్వ ఉద్యోగిని అయిన తనకు ఫోన్ చేసి చందర్ కుమార్ వేధించేవారని సాక్ష్యాలతో సహా పోలీసులకు ఫిర్యాదు చేసింది. దీంతో నిర్భయ చట్టం కింద పోలీసులు కేసు నమోదు చేశారు. అయితే స్పెషల్ బ్రాంచ్‌లో పనిచేస్తున్న ఇన్స్‌పెక్టర్‌పై కేసు నమోదు కావడంతో హైదరాబాద్ పోలీస్ కమిషనర్ వెంటనే స్పందించారు. మంగళవారం ఉదయం చందర్ కుమార్‌ను సస్పెండ్ చేస్తూ ఆదేశాలు జారీ చేశారు.