రాణా: సదర్ వేడుకల్లో రాజా.. కోట్ల విలువ, వీర్యం ఖరీదే లక్షల్లో

దీపావళి పండుగ వేళ యాదవ సోదరులు ప్రతిష్టాత్మకంగా నిర్వహించే సదర్ వేడుకలకు చారిత్రక భాగ్యనగరం సిద్ధమైంది. అందంగా ముస్తాబు చేసిన దున్నపోతులు సందడి చేస్తున్నాయి. సదర్ వేడుకను మహోన్నతమైన సాంస్కృతిక ఉత్సవంగా యాదవులు అభిర్ణిస్తున్నారు. నిజాం కాలం నుంచి ప్రతిష్టాత్మకంగా నిర్వహిస్తున్న ఈ వేడుకలు యాదవుల సాంస్కృతిక అస్థిత్వాన్ని ఆవిష్కరిస్తాయి. ఈసారి ఈ ఉత్సవాల్లో ‘రాణా’ సందడి చేయనుంది. హర్యానాకు చెందిన ప్రముఖ దున్నపోతు సుల్తాన్ వారసత్వానికి చెందిన రాణా గురించి ఆసక్తికర వివరాలు..

ప్రస్తుతం రాణా వయసు రెండున్నరేళ్లు. అతి తక్కువ కాలంలోనే భారీ ఆకారంతో ఈ దూడ అందరినీ ఆశ్చర్యపరుస్తోంది. రాణాకు 3 నెలల వయసు ఉన్నప్పుడు 3 లక్షలు ఇచ్చి హర్యానాలో కొనుగోలు చేసినట్లు దాని యజమాని మధు యాదవ్ తెలిపారు. మంగళవారం (అక్టోబర్ 29) నారాయణ గూడలోని వైఎంసీఏ కూడలిలో జరిగే సదర్ ఉత్సవాల్లో రాణా తన విన్యాసాలతో ఆకట్టుకోనుందని వెల్లడించారు.

Also Read: భర్త ఇంట్లో భార్య దొంగతనం.. రూ.80 లక్షల సొత్తు చోరీ, కారణమిదే

ప్రస్తుతం కోట్ల రూపాయలు వెచ్చించినా రాణా లాంటి దున్న దొరకదని దాని యజమాని తెలిపారు. రాణా నుంచి సేకరించే వీర్యం కూడ ఎంతో ఖరీదైందని వెల్లడించారు. నెలకు మూడు లక్షల వరకు దీని సంపాదన ఉంటుందని చెప్పారు.

రాణా రోజూ రాజ భోజనం చేస్తుంది. ఉదయం, సాయంత్రం 20 లీటర్ల పాల చొప్పున తాగుతుంది. దానికి అందించే ఆహారంలో అరటి పండ్లు, 5 కిలోల యాపిల్స్ సహా ఖరీదైన బాదం, పిస్తా, ఖర్జూరం తదితర పదార్థాలు కూడా ఉంటాయని యజమాని మధు తెలిపారు. రోజూ ఉదయం 5 కిలోమీటర్ల నడక సాగిస్తుందని.. అనంతరం ఇద్దరు వస్తాదులు రాణాకు చక్కగా మసాజ్ చేసి స్నానం చేపిస్తారని వెల్లడించారు.

రాణా భోజనానికి రోజూ రూ. 4 నుంచి 5 వేల వరకు ఖర్చవుతుందని దాని యజమాని తెలిపారు. ఖైరతాబాద్‌లో ఆయన పాల డైరీ నిర్వహిస్తున్నారు. ప్రస్తుతం ఖైరతాబాద్ బడా గణేష్ వద్ద ఉన్న ఆలయంలో రాణా ముస్తాబు అవుతోంది.