ఐరాసలో ప్రసంగించనున్న హైదరాబాద్ అమ్మాయిలు.. వీరి తపనకు హ్యాట్సాఫ్!

తమ తోటి పిల్లలు చదువుకుంటూ.. ఆటపాటలతో హాయిగా గడుపుతుంటే.. ఈ ఇద్దరు చిన్నారులు మాత్రం వయసుకు మించిన పరిణతి కనబర్చారు. సాటి చిన్నారులకు సాయం చేయడం కోసం తీవ్రంగా శ్రమిస్తున్నారు. ఎవరి పనిలో వారు బిజీ బిజీగా గడిపే ఈ రోజుల్లో.. తోటి చిన్నారులకు సాయం చేయడం కోసం ఆ పిల్లలకు వచ్చిన ఆలోచన మానవత్వానికి ఊపిరినిచ్చింది. ఆ చిన్నారులే హైదరాబాద్ లో పదవ తరగతి చదువుతున్న అంకితా రెడ్డి ఒంటెల, రియా తక్కల్.

ఏదైనా ప్రాజెక్ట్ చేయాలంటే చాలా మంది పరిశోధనలు లేదా ఆవిష్కరణల దిశగా ఆలోచిస్తారు. కానీ ఈ అమ్మాయిలు మాత్రం సాటి చిన్నారులకు సహాయం చేయడాన్నే ప్రాజెక్ట్‌గా ఎంచుకున్నారు. ఎంచుకోవటమే కాదు దాని కోసం తీవ్రంగా శ్రమిస్తున్నారు కూడా.

అనాథ పిల్లల కోసం, మానసిక వికలాంగులైన పిల్లల కోసం.. వారి చదువుల కోసం తమ వంతు సహాయంగా విరాళాలు సేకరించి ఆ పిల్లల ఉన్నతికి తోడ్పడుతూ అందరికీ ఆదర్శంగా నిలుస్తున్నారు. ఇంత చిన్న వయసులో తోటి పిల్లలు.. మానసిక వికలాంగులు చదువుకునేలా చేయూతనివ్వాలన్న ఆలోచన రావటమే గొప్ప విషయం.

అంతే కాదు ఆ మానసిక వికలాంగుల పిల్లల చదువుల కోసం వీరు విరాళాల సేకరిస్తున్నారు. ఆ విరాళాలను ఎప్పటికప్పుడు ఒక సంస్థ ద్వారా ఆ పిల్లల ఉన్నతికి ఉపయోగిస్తూ అందరి ప్రశంశలు పొందుతున్నారు. అంతే కాదు వచ్చే నెల మొదటివారంలో ఐరాస (UNO)లో.. ఈ ప్రాజెక్ట్ గురించిన విశేషాలను అక్కడ జరిగే సమావేశంలో ప్రసంగించే అరుదైన అవకాశం పొందారు. అతి చిన్న వయసులో యూఎన్ సమావేశంలో ప్రసంగించి రికార్డ్ సృష్టించనున్నారు ఈ చిన్నారులు. ఇంత చిన్న వయసులో ఈ అమ్మాయిలకు సాటి చిన్నారుల పట్ల ఏదో చేయాలన్న తపన ఉండటం, అసలు అంత పెద్ద ఆలోచన వచ్చిన వీరిని మనమందరం అభినందించి తీరాల్సిందే.

తాము ఏం చేస్తున్నామో వివరిస్తున్న అంకితా రెడ్డి ఒంటెల, రియా తక్కల్..