ఇంటర్ ఫలితాలు: మరో విద్యార్థిని ఆత్మహత్య

ఇంటర్ విద్యార్థుల ఆత్మహత్య ఘటనలు కొనసాగుతున్నాయి. ఇంటర్ ఫలితాల వెల్లడి తర్వాత హైదరాబాద్ నగరంలో 24 గంటల వ్యవధిలో ముగ్గురు విద్యార్థులు ఆత్మహత్య చేసుకున్నారు. ఈ నెల30న పదో తరగతి పరీక్ష ఫలితాలు విడుదల కానున్నట్లు విద్యా శాఖ మంత్రి సబితా ఇంద్రారెడ్డి వెల్లడించడంతో టెన్త్ క్లాస్ చదువుతున్న మరో విద్యార్థి ఆత్మహత్య చేసుకున్నాడు. ఇప్పటికే నలుగురు విద్యార్థులు ఇలా బలవన్మరణం చెందగా.. నేడు మరో విద్యార్థిని ఆత్మహత్య చేసుకుంది. చాదర్‌ఘాట్ పోలీస్ స్టేషన్ పరిధిలోని చంచల్‌గూడలో లహరి అనే విద్యార్థిని ఇంటర్మీడియట్ చదువుతోంది. నిన్న విడుదలైన ఇంటర్ పరీక్ష ఫలితాల్లో ఆమె ఫెయిల్ కావడంతో తండ్రి మందలించినట్లు తెలుస్తోంది. దీంతో తీవ్ర మనస్తాపానికి గురైన లహరి ఇంట్లో ఎవరూ లేని సమయంలో ఉరి వేసుకుని ఆత్మహత్య చేసుకుంది.

ఘటనకు సంబంధించిన సమాచారం అందుకున్న పోలీసులు వెంటనే అక్కడికి చేరుకొని మృతదేహాన్ని స్వాధీనం చేసుకొని పోస్టుమార్టం నిమిత్తం ఉస్మానియా ఆస్పత్రికి తరలించారు. ఘటనపై కేసు నమోదు చేసుకుని దర్యాప్తు చేస్తున్నారు.