హైదరాబాద్ మేయర్‌కు రెండోసారి కరోనా నెగెటివ్‌

జీహెచ్‌ఎంసీ (హైదరాబాద్‌ మహానగర పాలక సంస్థ) మేయర్‌ బొంతు రామ్మోహన్‌కు కరోనా నెగెటివ్ అని తేలింది. ఆయనకు శుక్రవారం రెండోసారి నిర్వహించిన కరోనా పరీక్షల్లో కరోనా నెగెటివ్‌ అని నిర్ధారణ అయ్యింది. మేయర్‌కు నెగటివ్‌గా నిర్ధారణ కావడంతో అంతా ఊపిరి పీల్చుకున్నారు. బుధవారం మేయర్ పేషీలో ఓ అంటెండర్‌కు, గురువారం మేయర్‌ డ్రైవర్‌కు కరోనా పాజిటివ్‌ రావడంతో మేయర్‌కు కూడా కరోనా సోకి ఉంటుందేమో అనే అనుమానాలు తలెత్తాయి. ఈ క్రమంలోనే ముందు జాగ్రత్తగా మేయర్‌కు కొవిడ్‌ పరీక్షలు చేయాలని నిర్ణయించారు.

ఇందులో భాగంగానే గురువారం ఆయన నుంచి వైద్యులు నమూనాలు సేకరించారు. ఆ నివేదికల్లో నెగెటివ్‌ వచ్చినట్లు అధికారులు తెలిపారు. దీంతో మేయర్‌ కుటుంబసభ్యులు, జీహెచ్ఎంసీ అధికారులు అంతా ఊపిరి పీల్చుకున్నారు.

కొద్ది రోజుల క్రితం క్షేత్రస్థాయి పర్యటనలో భాగంగా గతంలో నగరంలోని రోడ్డు పక్కనే ఉన్న ఓ చాయ్ దుకాణంలో అధికారులతో కలిసి మేయర్‌ సరదాగా టీ తాగారు. ఆ హోటల్‌లో పనిచేసిన వ్యక్తికి కరోనా వచ్చిందని తేలడంతో వారం క్రితం మేయర్‌ సైతం పరీక్ష చేయించుకోగా ఆ నివేదికల్లో నెగెటివ్‌ వచ్చింది.