టీఆర్ఎస్‌కు ఈసీ బిగ్ షాక్.. కేసీఆర్ సభ అక్కడ లేనట్లేనా?

దేశంలోని వివిధ రాష్ట్రాల్లో జరుగుతున్న ఉప ఎన్నికలు, అక్కడి కోడ్ అమలుపై కేంద్ర ఎన్నికల సంఘం సీరియస్ అవుతూ తాజాగా ప్రకటన జారీ చేసింది. ఉప ఎన్నికలు జరుగుతున్న నియోజకవర్గాలకు సంబంధించిన కోడ్ వర్తింపు, అధికారులు ఎలా అమలు చేయాలనే దానిపై స్పష్టమైన మార్గదర్శకాలు ఉన్నప్పటికీ రాజకీయ పార్టీలు ఉల్లంఘిస్తున్నా.. అధికారులు పట్టించుకోవట్లేదని పేర్కొంది. ఈ మేరకు కేంద్ర ఎన్నికల సంఘం జాయింట్ డైరెక్టర్ అనూజ్ చందక్ గురువారం ప్రకటన విడుదల చేశారు. పరోక్షంగా హుజూరాబాద్ ఉప ఎన్నిక విషయంలో జరుగుతున్న పార్టీల ప్రచారాన్ని కూడా ఆయన ప్రస్తావించి ఉల్లంఘనలు జరుగుతున్నాయని అందులో పేర్కొన్నారు. హుజూరాబాద్‌ ఉప ఎన్నికలకు సంబంధించి ఈనెల 27న హుస్నాబాద్‌ నియోజకవర్గం పరిధిలోని ఎల్కతుర్తి మండలం పెంచికల్ పేటలో సీఎం కేసీఆర్‌ బహిరంగ సభకు అన్ని ఏర్పాట్లు చేస్తున్నారు. ఎన్నికల నిబంధనల ప్రకారం హుజూరాబాద్‌ నియోజకవర్గంలో భారీ బహిరంగ సభలను నిర్వహించుకునేందుకు వీలు లేదు.. ఈ నేపథ్యంలోనే హుజూరాబాద్ పక్కనే ఉండే ప్రాంతమైన పెంచికల్ పేటను టీఆర్‌ఎస్‌ ఎంచుకుంది. అయితే హుజూరాబాద్ జనాన్నే అక్కడికి తరలించాలని భావించింది..

ఈ క్రమంలోనే కేంద్ర ఎన్నికల సంఘం తాజా ఉత్తర్వులతో పెంచికల్ పేట సభకు చిక్కులు ఏర్పడినట్లయింది. తాజాగా పేర్కొన్న మేరకు కరీంనగర్, హన్మకొండ జిల్లాల్లోనూ ఎన్నికల కోడ్ వర్తించనున్నట్లు స్పష్టమవుతోంది. ఉప ఎన్నిక జరుగుతున్న నియోజకవర్గానికి కొంత దూరంలో ఉండే ప్రాంతంలో భారీ స్థాయి బహిరంగ సభలు పెట్టడం కోడ్‌లో పేర్కొన్న నిబంధనలకు విరుద్ధమేనని కూడా సీఈసీ జాయింట్ డైరెక్టర్ అనూజ్ చందక్ తాజా ప్రకటనలో తెలిపారు.