Santosh Babu: నాన్న కల నెరవేర్చడం కోసం సైన్యంలో చేరి.. దేశం కోసం అమరుడై..

భారత్-చైనా మధ్య ఘర్షణల్లో సూర్యాపేటకు చెందిన కల్నల్ సంతోష్ అమరుడైన సంగతి తెలిసిందే. తండ్రి కోరిక నెరవేర్చడం కోసం ఆర్మీలో చేరిన బిక్కుమళ్ల సంతోష్ బాబుకు చిన్నతనం నుంచే దేశభక్తి మెండు. బ్యాంకు ఉద్యోగి అయిన సంతోష్ తండ్రి ఉపేందర్‌కు ఆర్మీలో ఉద్యోగం చేయాలనేది కల. తన తండ్రి కలను నెరవేర్చడం కోసం సైన్యంలో చేరిన సంతోష్.. అనతి కాలంలో ఉన్నత శిఖరాలను అధిరోహించాడు. ఆరో తరగతి నుంచి కోరుకొండ సైనిక్ స్కూల్‌లో చదివిన ఆయన.. తర్వాత డిఫెన్స్ సర్వీసెస్ స్టాఫ్ కాలేజీలో శిక్షణ పొందారు. 2004లో సైన్యంలో చేరారు.

సంతోష్ బాబు మాలో స్ఫూర్తి నింపేవాడు, మార్గదర్శకుడిలా వ్యవహరించే వాడని ఆయనతోపాటు శిక్షణ పొందిన సహచరుడొకరు వ్యాఖ్యానించారు. భారత్‌తో కుదిరిన ఒప్పందం ప్రకారం చైనా సైనికులు గాల్వాన్ లోయ నుంచి వెనక్కి వెళ్లాల్సింది. కానీ అనూహ్యంగా ఐరన్ పోల్స్, రాళ్లతో దాడి చేశారు.

15 ఏళ్ల సర్వీసులో నాలుగు ప్రమోషన్లు పొందిన సంతోష్ బాబు.. 37 ఏళ్ల వయసులోనే కల్నల్ హోదాను పొందారు. సంతోష్ బాబు సర్వీస్ మొత్తం కాశ్మీర్, అరుణాచల్ ప్రదేశ్, లడఖ్‌లలో సాగింది. పాకిస్థాన్ సరిహద్దుల్లో పని చేసిన ఆయన కొంత కాలం కాంగోలో విధులు నిర్వర్తించారు. 2007లో పాక్ సరిహద్దుల్లో ముగ్గురు చొరబాటుదారులను తుదముట్టించారు. రెండేళ్లుగా చైనా సరిహద్దుల్లో విధులు నిర్వర్తిస్తున్నారు.

2010లో ఆయనకు సూర్యాపేటకే చెందిన సంతోషితో వివాహం జరిగింది. వీరికి కుమార్తె అభిజ్ఞ, కుమారుడు అనిరుధ్‌ ఉన్నారు. సంతోష్ బాబు తల్లిదండ్రులు, అత్తగారు ఇద్దరూ సూర్యాపేటకే చెందిన వారు కావడంతో పట్టణంలో విషాద ఛాయలు అలుముకున్నాయి.

నెల రోజుల క్రితమే సంతోష్‌కు హైదరాబాద్ బదిలీ అయ్యింది. కానీ సరిహద్దుకు చేరుకోవాల్సిన బెటాలియన్ వెళ్లలేకపోవడం, చైనాతో ఉద్రిక్తతలు తలెత్తడంతో ఆయన లడఖ్‌లోనే ఉండిపోయారు. మరో నెల రోజుల్లో హైదరాబాద్ వస్తాడని కుటుంబ సభ్యులు ఆశించగా.. ఈలోపే ఆయన దేశం కోసం అమరుడయ్యారు.