కరోనా రోగికి వైద్యం చేసిన జగిత్యాల ఎమ్మెల్యే

తెలంగాణలో కూడా కరోనా కేసులు నమోదవుతున్నాయి. పలువురు కరోనా వైరస్ బారిన పడి ఇళ్లలోనే చికిత్స పొందుతున్నారు. కొందరికి ఆస్పత్రుల్లో బెడ్‌లు కూడా దొరక్కపోవడంతో ఇంట్లోనే ఉంటూ కరోనాకు చికిత్స పొందుతున్నారు. అయితే కరోనా బారిన పడ్డ ఓ వ్యక్తికి కరోనాకు తోడు కాలు విరిగిపోయింది. దీంతో నరకయాతన అనుభవిస్తున్న రోగి దుస్థితి గురించి చలించిపోయారు జగిత్యాల ఎమ్మెల్యే డా. సంజయ్. తన ఎమ్మెల్యే హోదాను పక్కన పెట్టి నేరుగా రోగి ఇంటికి వెళ్లి వైద్యం అందించి తన మానవత్వాన్ని చాటుకున్నారు. స్వతహాగా డాక్టర్ అయిన సంజయ్ ప్రజాప్రతినిధిగా గెలిచి నిత్యం బిజీగా ఉన్నప్పటికి.. రోగి అవస్థను చూసి మానవీయంగా స్పందించి వైద్యం అందించడంపై స్థానిక ప్రజలు ఎమ్మెల్యే సేవలను ప్రశంసిస్తున్నారు.

వివరాల్లోకి వెళ్తే.. జిల్లాలోని అంతర్గాంకు చెందిన గీత కార్మికుడు శంకర్ గౌడ్ ఇటీవల ప్రమాదవశాత్తు ఇంట్లో జారిపడగా తలకు తీవ్రగాయమై కాలు విరిగింది. అయితే కరీంనగర్ లోని పలు ఆస్పత్రుల్లో అతడు చికిత్స చేయించుకున్నారు. అయితే అతనికి కరోనా పాజిటివ్ గా తేలింది. దీంతో ఇంటి వద్దే హోం ఐసోలేషన్ లో ఉంటున్న శంకర్ గౌడ్ ఇటు తలకు గాయం, కాలు విరగటంతో నరకయాతన అనుభవిస్తున్నాడు. స్థానికులు, గ్రామస్తుల ద్వారా శంకర్ గౌడ్ విషయం తెలుసుకున్న జగిత్యాల ఎమ్మెల్యే డా. సంజయ్ కుమార్ ఆర్థోపెడిక్ సర్జన్ డా. నవీన్, అసిస్టెంట్ రవికిరణ్ తో కలిసి పీపీఈ కిట్స్ ధరించి శంకర్ గౌడ్ ఇంట్లోనే కాలుకు చికిత్స చేశారు.
Read More: తెలంగాణ ప్రజలకు ఊరట.. స్వల్పంగా తగ్గిన కరోనా కేసులు
దీంతో తన కాలుకు తగిన చికిత్స అందడంతో శంకర్ గౌడ్ నొప్పి నుంచి కాస్త ఉమశమనం పొందాడు. కరోనాతో పోరాడుతున్నప్పటికి అలాంటి తీవ్ర లక్షణాలేవి లేవని, కేవలం తలకు గాయం, కాలు విరగటంతో నొప్పి భరించలేక నరకయాతన అనుభవిస్తున్నందున ఉపశమనం కోసం తక్షణ వైద్యం అందించామని ఎమ్మెల్యే తెలిపారు. కరోనా నెగెటివ్ ఫలితం అనంతరం పూర్తి స్థాయిలో శస్త్ర చికిత్స అందిస్తామని కుటుంబ సభ్యులకు ఎమ్మెల్యే డా.సంజయ్ భరోసా ఇచ్చారు. అంతేకాదు కరోనా సోకిన వ్యక్తుల్ని చూసి భయపడకూడదన్నారు. వారికి అండగా నిలవాలన్నారు.