టీపీసీసీ చీఫ్ ఖరారు.. రేవంత్ కాకుండా అనూహ్యంగా ఆయనకు పగ్గాలు

తెలంగాణ ప్రదేశ్ కాంగ్రెస్ కమిటీ అధ్యక్షుడి ఎవరు అన్న సస్పెన్స్‌కు త్వరలోనే తెర పడే సూచనలు కనిపిస్తున్నాయి. టీపీసీసీ కొత్త చీఫ్‌గా అనూహ్యంగా మరో పేరు తెరపైకి వచ్చింది. సీనియర్ నేత, ప్రస్తుతం ఎమ్మెల్సీగా ఉన్న జీవన్ రెడ్డిని టీపీసీసీ చీఫ్ గా కాంగ్రెస్ అధిష్ఠానం నిర్ణయించుకుందని తెలుస్తోంది. ఈ విషయంలో అధికారిక ప్రకటన ఇంకా వెలువడలేదు. అయితే ఇవాళ సోనియా గాంధీ తుది నిర్ణయం తీసుకుంటారని పార్టీ వర్గాలు వెల్లడించాయి. రేవంత్ రెడ్డి పేరు ప్రముఖంగా వినిపించినా అనేకమంది సీనియర్ల కూడా రేసులో నిలబడ్డారు.

వారం క్రితమే జీవన్‌రెడ్డిని ఢిల్లీకి పిలిచి మాట్లాడింది హైకమాండ్. ఆ తర్వాత దీనిపై తుదినిర్ణయం తీసుకుంది. సీనియర్ ఖాతాలో పీసీసీ చీఫ్ ఇచ్చినా చేయటానికి సిద్ధంగా ఉండాలని జీవన్‌ రెడ్డికి ఠాగూర్ సూచించినట్లు సమాచారం. సోమవారం రాత్రి రాష్ట్రవ్యవహరాల ఇంచార్జ్ ఠాగూర్ సమావేశమైన సోనియా గాంధీతో పీసీసీ నియామక ప్రక్రియను పూర్తిచేశారు. ఇదే సమయంలో రేవంత్ రెడ్డికి ప్రచార కమిటీ బాధ్యతలు ఇస్తారని తెలుస్తోంది. అయితే ఈ పదవికి రేవంత్ రెడ్డితో పాటు కోమటిరెడ్డి వెంకట్ రెడ్డి, డీ శ్రీధర్ బాబు, మధుయాష్కి గౌడ్, డీ రాజనర్సింహ తదితరుల పేర్లనూ పరిశీలించారన్న సంగతి తెలిసిందే.

Read More: రైతు అన్ని విధాలుగా బంద్... విజయశాంతి కీలక వ్యాఖ్యలు

మరోవైపు రేవంత్ విషయంలో హైకమాండ్ కాస్త వెనుకడుగు వేసినట్లు సమాచారం. పలువురు సీనియర్ నేతలు రేవంత్ రెడ్డిని వ్యతిరేకించడం, అంతేకాకుండా వరుసగా అధిష్టానంకు తమ అభిప్రాయాలు తెలుపుతూ లేఖలు రాయడంతో రేవంత్ రెడ్డిని పక్కన పెట్టింది. సీనియర్ నాయకుల్ని సంతృప్తి పరిచేవిధంగా జీవన్ రెడ్డి పేరు ఖరారు చేసినట్లు సమాచారం. మరోవైపు ఇదే సమయంలో మీడియాతో మాట్లాడిన రేవంత్ తనకు పీసీసీ పదవిపై అంత ఆసక్తి లేదని వ్యాఖ్యలు చేయడం కూడా ఆసక్తికరంగా మారింది. తనకు ప్రచార కమిటీగా బాధ్యతలు ఇస్తే సమర్థవంతంగా నిర్వహిస్తానని చెప్పడం కూడా.. రేవంత్‌ను ఈ విషయంలో హైకమాండ్ సర్దిచెప్పినట్లు తెలుస్తోంది.