ఉస్మానియా: ‘చెట్టు కింద ఆపరేషన్’ చేస్తూ జూడాలు వినూత్న నిరసన.. వీడియో

ఉస్మానియా ఆస్పత్రిలో జూనియర్ వైద్యులు వినూత్న రీతిలో నిరసన చేపట్టారు. ఒక రోగి ఆసుపత్రిలోకి వచ్చాక పరిస్థితి ఏ విధంగా ఉంటుందో నాటక రూపంలో చూపించారు. రోగి ఆస్పత్రికి వస్తే తీసుకెళ్లడానికి స్ట్రెక్చర్ లేకుండా ఉందని, కనీసం ఆక్సిజన్ కూడా ఇవ్వలేని పరిస్థితులు దాపురించాయని ఆరోపించారు. రోగులకు ఇక్కడ ఎలాంటి చికిత్స అందిస్తున్నారో, అతనికి ఎలాంటి పరిస్థితులు ఉంటాయో కళ్లకు కట్టినట్లు చూపించే ప్రయత్నం చేశారు. ఇందుకు ఓ మనిషి బొమ్మను తయారు చేసి దానికి బట్టలు తొడిగి శస్త్ర చికిత్స చేసినట్లు నటించారు. ఉస్మానియా జనరల్ ఆస్పత్రి ఎదుటే టేబుల్‌పై మనిషి బొమ్మను పడుకోబెట్టి జూనియర్ డాక్టర్లు ఈ నిరసన చేపట్టారు.

అంతేకాక, ప్లకార్డులు నిరసనలతో ప్రాంగణాన్ని హోరెత్తించారు. ‘ప్రజల రక్షణే మాకు ముఖ్యం.. వైద్యానికి మేం సిద్ధం’, ‘చెట్టు కింద ఆపరేషన్ థియేటర్’, ‘డీఎంఈ తీరును ఖండించాలి’, ‘ప్రభుత్వం వెంటనే స్పందించాలి’ అంటూ ప్లకార్డులు ప్రదర్శించారు.