కశ్మీర్ ఎవరి జాగీరు కాదు: బీజేపీ ఎంపీ

జమ్మూ కశ్మీర్‌కు స్వయం ప్రతిపత్తి కల్పించే ఆర్టికల్ 370 రద్దుపై కరీంనగర్ ఎంపీ బండి సంజయ్ స్పందించారు. జమ్మూకశ్మీర్‌ భారత్‌లో అంతర్భాగమేనని, అది ఎవరి జాగీరు కాదని బీజేపీ ఆయన వ్యాఖ్యానించారు. ఓకే దేశం.. ఓకే రాజ్యాంగం అని నినదించిన భారతీయ జనసంఘ్ వ్యవస్థాపకుడు శ్యామాప్రసాద్ ముఖర్జీ కల నెరవేరిందని అభిప్రాయం వ్యక్తం చేశారు. భారతీయులందరూ సంబరాలు జరుపుకోవాల్సిన శుభదినం అని పేర్కొన్నారు.

ఎన్నికల సమయంలో ఆర్టికల్ 370 రద్దు గురించి మేనిఫేస్టోలో పెట్టినప్పటికీ, రాజ్యసభలో సరైన మెజారిటీ లేనందునే ఆలస్యమైందన్నారు. ప్రధాని మోదీ, హోం మంత్రి అమిత్‌ షాలు దేశ ప్రజలకిచ్చిన వాగ్దానాన్ని నెరవేర్చారని ప్రశంసించారు.

కాంగ్రెస్ పార్టీది ద్వంద్వ వైఖరి..
కశ్మీర్ అంశంలో కాంగ్రెస్ పార్టీ ద్వంద్వం వైఖరి అవలంభిస్తోందని కరీంనగర్ ఎంపీ బండి సంజయ్ ఆరోపించారు. 370 ఆర్టికల్ రద్దు అంశాన్ని వ్యతిరేకించే పార్టీలు సిగ్గుతో తలదించుకోవాలని విమర్శించారు. అసలు కశ్మీర్ భారత దేశంలో అంతర్భాగమో కాదో ఆ పార్టీలు స్పష్టం చేయాలన్నారు. కశ్మీర్‌కు సంబంధించి అన్ని అంశాలను పరిగణలోకి తీసుకొని కేంద్ర ప్రభుత్వం ఆర్టికల్‌ను రద్దు చేసిందని బండి సంజయ్ తెలిపారు. కశ్మీర్ అభివృద్ధికి బీజేపీ కట్టుబడి ఉందన్నారు. రాజకీయాలకు అతీతంగా దేశంలోని పార్టీలన్నీ ఆర్టికల్ 370 రద్దును స్వాగతించి, మద్దతు తెలపాలని కోరారు.

జమ్ము కశ్మీర్‌కు సంబంధించి కేంద్ర ప్రభుత్వం సోమవారం కీలక నిర్ణయం తీసుకుంది. ఆర్టికల్ 370 రద్దుతో పాటు ఆ రాష్ట్రాన్ని రెండు కేంద్ర పాలిత ప్రాంతాలుగా విభ‌జిస్తూ సోమవారం (ఆగస్టు 5) కేంద్ర హోం మంత్రి అమిత్ షా రాజ్య‌స‌భ‌లో బిల్లు ప్ర‌వేశ‌పెట్టారు. ఈ బిల్లులకు సంబంధించి దేశంలోని పార్టీలన్నీ భిన్న అభిప్రాయాలు వ్యక్తం చేశాయి. కాంగ్రెస్, పీడీపీ, డీఎంకే తదితర పార్టీలు కేంద్రం నిర్ణయాన్ని వ్యతిరేకించగా, బీఎస్పీ, బీజేడీ, ఆమ్‌ఆద్మీ, అన్నాడీఎంకే, వైఎస్ఆర్ కాంగ్రెస్ పార్టీలు సమర్థించాయి.