పది పరీక్షలు రద్దా.. నిర్వహిస్తారా.. కేసీఆర్ కీలక భేటీ 8న

తెలంగాణలో పదో తరగతి పరీక్షల నిర్వహణపై ఉత్కంఠ మరొక రోజుపాటు కొనసాగనుంది. జీహెచ్ఎంసీ, రంగారెడ్డి జిల్లా మినహా రాష్ట్రమంతా పది పరీక్షలు నిర్వహించుకోవచ్చని హైకోర్టు తీర్పు ఇచ్చిన సంగతి తెలిసిందే. అనంతరం హైకోర్టు తీర్పుపై విద్యాశాఖ చర్చించింది. వేర్వేరుగా పరీక్షలు నిర్వహిస్తే సాంకేతికంగా అనేక ఇబ్బందులతో పాటు విద్యార్థులు గందరగోళానికి, ఆందోళనకు గురయ్యే అవకాశం ఉన్నందున హైకోర్టు సూచించిన మేరకు పరీక్షలు నిర్వహించడం సాధ్యం కాదని అభిప్రాయపడింది. ఈ మేరకు పదో తరగతి పరీక్షలను వాయిదా వేస్తూ ప్రభుత్వం శనివారం ఉత్తర్వులు జారీ చేసింది. దీనిపై ఆదివారం సీఎం సమీక్ష జరిపి నిర్ణయం తీసుకుంటారని ప్రచారం జరిగింది. కానీ సమీక్షను సోమవారం మధ్యాహ్నం జరపాలని నిర్ణయించారు.

Must Read: undefined

పరీక్షల నిర్వహణపై సోమవారం మధ్యాహ్నం కేసీఆర్‌ ప్రగతి భవన్‌లో ఉన్నత స్థాయి సమావేశం నిర్వహించనున్నారు. మళ్లీ పరీక్షలు నిర్వహించాలా లేదా గత పరీక్షల్లో వచ్చిన మార్కుల ఆధారంగా గ్రేడ్లు ఇవ్వాలా అనే దానిపై కీలక నిర్ణయం తీసుకుంటారు. పరీక్షల రద్దుకే ప్రభుత్వం మొగ్గు చూపేలా అవకాశాలు కనిపిస్తున్నాయి. విద్యాశాఖ అధికారులు సైతం ఇదే అభిప్రాయాన్ని వ్యక్తం చేసినట్లు సమాచారం. పరీక్షలను రద్దు చేసి అంతర్గత మార్కుల ఆధారంగా గ్రేడ్లు ఇవ్వాలని భావిస్తున్నట్లు తెలుస్తోంది. తెలంగాణ సీఎంఓ కార్యాలయం సమాచారం మేరకు..రేపు మధ్యాహ్నం 2 గంటలకు ప్రగతి భవన్‌లో విద్యాశాఖ మంత్రి సబితా ఇంద్రారెడ్డి, ఉన్నతాధికారులతో సీఎం ఉన్నత స్థాయి సమీక్ష సమావేశం నిర్వహించనున్నారు.

కరోనా నివారణా చర్యలు, లాక్‌ డౌన్‌ అమలుపైన సీఎం కేసీఆర్‌ సోమవారం సాయంత్రం 4.30కు సమీక్ష నిర్వహించనున్నారు. ఈ సమీక్షకు వైద్య ఆరోగ్యశాఖ మంత్రి ఈటల రాజేందర్‌, సీనియర్‌ అధికారులు హాజరుకానున్నారు.

Don't Miss: undefined