Danam Nagender: అమిత్ షాను బూచిలా చూపెట్టి రాజకీయం చేస్తున్నారు

Danam Nagender: కేంద్ర హోం మంత్రి అమిత్‌షాను బూచిలా చూపిస్తూ.. బీజేపీ రాజకీయాలు చేస్తోందని ఖైరతాబాద్ ఎమ్మెల్యే దానం నాగేందర్ విమర్శించారు. ఇది సహించరాని నేరమని ఆగ్రహం వ్యక్తం చేశారు. రాష్ట్ర ప్రభుత్వానికి వ్యతిరేకంగా.. తెలంగాణ విమోచన దినోత్సవం పేరుతో ఏవో కార్యక్రమాలు చేశారని విమర్శించారు. ఇతర రాష్ట్రాల నుండి నాయకులను తెచ్చి తెలంగాణలో రాజకీయాలు చేస్తోందని మండిపడ్డారు. మహారాష్ట్ర సీఎం ఏక్ నాథ్ షిండేకు తెలంగాణ గురించి ఏం తెలుసని దానం ప్రశ్నించారు. తాము అడిగిన ప్రశ్నలకు మాత్రం ఏ ఒక్కరూ సమాధానం చెప్పరని దానం నాగేందర్ అసహనం వ్యక్తం చేశారు. కేంద్రంలోని బీజేపీ పాలన బ్రిటీష్ వారి పరిపాలనలా ఉందని విమర్శించారు. దమ్ముంటే తెలంగాణలో అమలు చేసే గిరిజన రిజర్వేషన్లను ఆపి చూడాలని కేంద్రానికి సీఎం కేసీఆర్ సవాల్ విసిరారని పేర్కొన్నారు.

సెప్టెంబర్ 17న తెలంగాణ జాతీయ సమైక్యతా దినోత్సవం సందర్భంగా.. గిరిజనులకు 10 శాతం రిజర్వేషన్లు అమలు చేస్తామని సీఎం కేసీఆర్ వెల్లడించారు. వారం రోజుల్లోనే జీవో కూడా విడుదల చేస్తామని స్పష్టం చేశారు. కేంద్రం ఆమోదించినా లేకున్నా.. గిరిజన రిజర్వేషన్లు అమలు చేసి తీరతామని కేసీఆర్ బల్లగుద్ది చెప్పారు. గిరిజన రిజర్వేషన్ల జీవోను అమలు చేస్తారా.. లేకుంటే దాన్నే ఊరి తాడు చేసుకుంటారా.. అని ప్రధాని మోదీని కేసీఆర్ ప్రశ్నించిన సంగతి తెలిసిందే.

• Read More Telangana News and Telugu News