కేటీఆర్ సీఎం అయితే తప్పేంటి ... దానం కీలక వ్యాఖ్యలు

తెలుగు రాష్ట్రాల్లో కరోనా వైరస్‌ కేసులతో పాటు పలువురు నేతల వ్యాఖ్యలు కూడా ఇప్పుడు హాట్ టాపిక్‌గా మారాయి. తాజాగా టీఆర్ఎస్ నేత దానం నాగేందర్ ఆసక్తికర వ్యాఖ్యలు చేశారు. గత కొన్ని రోజులుగా త్వరలోనే మంత్రి కేటీఆర్ తెలంగాణలో రకరకాల ఊహాగానాలు వినిపిస్తున్నాయి. వాటికి మరింత ఊతం ఇచ్చేలా ఇప్పుడు దానం నాగేందర్ పలు కీలక వ్యాఖ్యలు చేశారు. ముఖ్యమంత్రి కావడానికి కావాల్సిన అన్ని అర్హతలు కేటీఆర్‌కు ఉన్నాయన్నారు. అంతేకాదు కేటీఆర్ సీఎం అయితే తప్పేంటి అంటూ కూడా ఖైరతాబాద్ ఎమ్మెల్యే అయిన దానం నాగేందర్ ప్రశ్నించారు. కేటీఆర్ ముఖ్యమంత్రి కావాలని ఆ భగవంతున్ని కోరుకున్నానని తెలిపారు.
Read More: శ్రీశైలం ప్రమాద స్థలానికి కాంగ్రెస్ నేతలు.. అడ్డుకున్న పోలీసులుఇవాళ వినాయక చవితి సందర్భంగా ఖైరతాబాద్ వినాయకుడిని దర్శించుకున్న అనంతరం ఆయన మీడియాతో మాట్లాడారు. 10 అడుగుల విగ్రహం ఏర్పాటుకు అనుమతి ఇచ్చిన ముఖ్యమంత్రి కేసీఆర్, కేటీఆర్ కు కృతజ్ఞతలన్న ఆయన గిన్నీస్ బుక్ రికార్డు ఖైరతాబాద్ వినాయకుడి సొంతమని అన్నారు. కరోనాను పారద్రోలడానికి, ప్రజలకు భగవంతుడి ఆశీస్సులు ఉండాలని, వ్యాక్సిన్ తొందరగా రావాలని దానం ఆకాంక్షించారు. ప్రజలు సుఖసంతోషాలతో ఉండాలని అన్నారు. దేశ చరిత్రలో తెలంగాణ రాష్ట్రం అన్ని రంగాల్లో ముందుందని, కరోనా వస్తుందని తెలిసి ముఖ్యమంత్రి కేసీఆర్ ముందుగా హెచ్చరించారని అన్నారు. డిసెంబర్ వరకు మహమ్మారి కనుమరుగు అవుతుందని ఆయన ఆశాభావం వ్యక్తం చేశారు.