డెంగీ జ్వరం బారిన పడి.. ఖమ్మం మహిళా జడ్జి మృతి

వాతావరణ మార్పుల కారణంగా తెలుగు రాష్ట్రాలను డెంగీ, విష జ్వరాలు వణికిస్తున్నాయి. హైదరాబాద్ సహా ఇతర ప్రాంతాల్లో విష జ్వరాలు, డెంగీ బారిన పడి లక్షల సంఖ్యలో జనం ఆసుపత్రి పాలవుతున్నారు. సెప్టెంబర్ తొలి వారం నాటికి ఖమ్మం జిల్లాలోనే 1300 డెంగీ కేసులు నమోదయ్యాయి. దీన్ని బట్టి అక్కడ పరిస్థితి ఎలా ఉందో అర్థం చేసుకోవచ్చు. డెంగీ జ్వరం కారణంగా ఖమ్మం రెండో అదనపు ప్రథమ శ్రేణి కోర్టు న్యాయమూర్తి ఎం. జయమ్మ ప్రాణాలు వదిలారు. కొద్దిరోజులుగా ఆమె హైదరాబాద్‌ కిమ్స్‌ ఆస్పత్రిలో చికిత్స పొందుతున్నారు. ఈ నేపథ్యంలో జయమ్మ సోమవారం తెల్లవారుజామున రెండు గంటలకు మృతి చెందినట్లు వైద్యులు తెలిపారు.

గుంటూరు జిల్లా సత్తెనపల్లిలో ప్రిన్సిపల్ జూనియర్ సివిల్ జడ్జిగా పనిచేసిన ఆమె గత ఏడాది డిసెంబర్‌లో ఖమ్మం రెండో అదనపు జూనియర్ సివిల్ జడ్జిగా బదిలీ అయ్యారు. జయమ్మ సొంతూరు మహబూబ్‌నగర్‌ జిల్లా హన్వాడ మండలం అయోధ్యనగర్‌.

డెంగీ కారణంగా జూనియర్ బాలయ్యగా పేరుతెచ్చుకున్న బాల నటుడు సాయి గోకుల్ ఇటీవలే కన్ను మూసిన సంగతి తెలిసిందే. ఇటీవలే ఓ డాక్టర్ కూడా డెంగీ బారిన పడి ప్రాణాలు వదిలారు. దోమ కాటు వల్ల వ్యాపించే డెంగీ కారణంగా.. ప్లేట్‌లెట్స్ సంఖ్య తగ్గుతుంది. సకాలంలో చికిత్స అందించడంతోపాటు ప్లేట్‌లెట్స్ కూడా ఎక్కించడం అవసరం. లేని పరిస్థితిల్లో ఈ వ్యాధి ప్రాణాంతకంగా మారుతుంది.