కేసీఆర్, ఒవైసీ కలిసి ఇక బిర్యానీ తింటారు: కిషన్ రెడ్డి

జీహెచ్‌ఎంసీ ఎన్నికల్లో టీఆర్‌ఎస్‌, ఎంఐఎం రహస్య పొత్తు పెట్టుకున్నాయని కేంద్రమంత్రి కిషన్‌ రెడ్డి మరోసారి ఆరోపించారు. రేపొద్దున మేయర్‌ ఎన్నికతో వారి బండారమంతా బయటపడుతుందని చెప్పారు. గ్రేటర్‌ ఎన్నికల్లో నగర ఓటరు ఏ పార్టీకీ స్పష్టమైన మెజారిటీ ఇవ్వలేదని తెలిపారు. ‘‘హైదరాబాద్‌ ఒక మినీ తెలంగాణ. అక్కడ ప్రజలు బీజేపీకి 48 సీట్లు ఇచ్చి ఆశీర్వదించారు. ఈ ఫలితాలు అధికార టీఆర్‌ఎస్‌కు చెంపపెట్టు. తెలంగాణలో బీజేపీ క్రమంగా బలపడుతోంది. 2023 అసెంబ్లీ ఎన్నికల్లో బీజేపీ గెలుపును ఒవైసీ, కేసీఆర్‌ ఎవరూ ఆపలేరు’’ అని కిషన్‌ రెడ్డి వ్యాఖ్యానించారు. కొత్తగా ఎన్నికైన కార్పొరేటర్లతో బీజేపీ కీలక నేతలు భేటీ అయ్యారు. వారికి అభినందనలు తెలుపుతూ భవిష్యత్‌ కార్యాచరణపై వ్యూహరచన చేశారు.

మేయర్‌ సీటు కోసం ఎంఐఎంతో టీఆర్‌ఎస్‌ పొత్తు పెట్టుకుంటుందని వార్తలు వస్తున్న నేపథ్యంలో శనివారం ఈ అంశంపై కిషన్‌ రెడ్డి వ్యగ్యంగా వ్యాఖ్యానించారు. కేసీఆర్‌, అసదుద్దీన్‌ ఒవైసీ కలిసి బిర్యానీ తింటారని నర్మగర్భ వ్యాఖ్యలు చేశారు. 2023 అసెంబ్లీ ఎన్నికల్లో బీజేపీదే విజయమని కేంద్ర హోంశాఖ సహాయమంత్రి కిషన్‌రెడ్డి ధీమా వ్యక్తం చేశారు. మొత్తం 48 డివిజనల్లో బీజేపీని గెలిపించిన ప్రజలందరికీ ధన్యవాదాలు తెలిపారు. భవిష్యత్‌లోనూహైదరాబాద్‌ ప్రజల ఆశీస్సులు కొనసాగాలని కోరారు.

100 గెలిచుండేవాళ్లం: బండి సంజయ్‌
అభ్యర్థులను ఖరారు చేసేందుకు కూడా సమయం ఇవ్వకుండా హడావుడిగా జీహెచ్ఎంసీ ఎన్నికలు నిర్వహించారని బీజేపీ రాష్ట్ర అధ్యక్షుడు బండి సంజయ్ ఆరోపించారు. సమయం ఇచ్చినట్లయితే 100 స్థానాలకు పైగా విజయం సాధించేవాళ్లమని అన్నారు. ఎన్నికలకు తక్కువ సమయం ఇచ్చినా కార్యకర్తలు బాగా పని చేశారని అన్నారు. ఎన్నికల కమిషన్‌ టీఆర్ఎస్ చెప్పు చేతల్లో నడిచిందని మరోసారి విమర్శించారు.

భవిష్యత్‌లో ఏ ఎన్నికలు జరిగినా బీజేపీ ప్రతిష్ఠాత్మకంగా తీసుకుంటామని సంజయ్‌ వివరించారు. త్వరలోనే గెలిచిన కార్పొరేటర్ అభ్యర్థులతో చార్మినార్‌ భాగ్యలక్ష్మి అమ్మవారిని దర్శించుకుంటామని బండి సంజయ్‌ అన్నారు.