సిరిసిల్ల: బావిలో పడ్డ చిరుత పులి.. సందిగ్ధంలో అటవీ అధికారులు!

రాజన్న సిరిసిల్ల జిల్లాలో అటవీ ప్రాంతం నుంచి పొలాల్లోకి వచ్చిన చిరుత పులి ప్రమాదవశాత్తు వ్యవసాయ బావిలో పడింది. సమాచారం అందుకున్న అటవీశాఖ అధికారులు దాన్ని రక్షించే పనిలో పడ్డారు. రాజన్న సిరిసిల్ల జిల్లాలోని బోయినపల్లి మండలం మల్కాపూర్ శివారులోని వ్యవసాయ బావిలో రాత్రి సమయంలో చిరుత పులి పడ్డట్లు స్థానికులు చెబుతున్నారు. వారు వెంటనే అటవీశాఖ అధికారులకు సమాచారం ఇచ్చారు.

వారు బావి వద్దకు చేరుకొని రెస్క్యూ టీం ద్వారా పులిని బయటకు తీసే ప్రయత్నం చేస్తున్నారు. బావిలోకి దిగేందుకు ఏ విధమైన మెట్లు లేకపోవడంతో వల వేసి దాన్ని బయటకు తీయాలా లేదా మత్తు మందు ఇచ్చి చిరుతను బయటకు తీసుకురావాలా అనే విషయంలో అధికారులు సందిగ్ధంలో ఉన్నారు.

చిరుత పులి బావిలో పడ్డ సంగతి తెలుసుకున్న చుట్టుపక్కల జనం దాన్ని చూసేందుకు పెద్దసంఖ్యలో బావి వద్దకు చేరుకున్నారు. చిరుతను సురక్షితంగా బయటకు తీసి అడవిలో విడిచిపెట్టాలని, అప్పుడే తాము ఎలాంటి భయాందోళనలు లేకుండా ప్రశాంతంగా ఉంటామని వారు అటవీశాఖ అధికారులను కోరుతున్నారు.

Must Read