మృతదేహాల నుంచి కరోనా వ్యాప్తి.. సీసీఎంబీ డైరెక్టర్ కీలక వ్యాఖ్యలు

తెలంగాణలో కరోనా వైరస్ కేసులు పెరుగుతున్నాయి. కరోనా కారణంగా మరణిస్తోన్న వారి సంఖ్య కూడా పెరుగుతోంది. చాలా సందర్భాల్లో కరోనా టెస్టులు చేయగా.. మరణించిన తర్వాత రిపోర్టులు రావడం.. ఈలోపు అంత్యక్రియలు పూర్తి చేయడం జరుగుతోంది. దీంతో కరోనాతో చనిపోయిన వారి అంత్యక్రియల విషయంలో ప్రభుత్వం ఆంక్షలు విధించింది. మృతదేహాన్ని తాకొద్దని, స్నానం చేయించడం లాంటివేం చేయొద్దని ఆదేశాలు జారీ చేసింది.

ఓ వ్యక్తి కరోనాతో చనిపోయాక డెడ్ బాడీ నుంచి ఇన్ఫెక్షన్ సోకుతుందనడానికి శాస్త్రీయ ఆధారాలు లేవని సీసీఎంబీ డైరెక్టర్ రాకేష్ కె. మిశ్రా తెలిపారు. మృతదేహం నుంచి కరోనా సోకే ముప్పు తక్కువేనని ఆయన అభిప్రాయపడ్డారు. డెడ్ బాడీ నుంచి ఏవైనా స్రావాలు బయటకు వస్తే.. వాటిని తాకితే మాత్రం కోవిడ్ సోకే అవకాశం ఉందని ఆయన తెలిపారు. డెడ్ బాడీలకు కరోనా టెస్టులు చేయడం వల్ల అంతగా ఉపయోగం లేదనేది తన వ్యక్తిగత అభిప్రాయమన్నారు.

కరోనా బారిన పడి వ్యక్తి చనిపోయాక మృతదేహంలో వైరస్ బతికే అవకాశాలు సమయం గడిచే కొద్దీ తగ్గుతాయని ఐసీఎంఆర్ గతంలో ప్రకటించింది. కానీ ఎంత సేపటిలో ఆ డెడ్ బాడీ నుంచి వైరస్ మాయం అవుతుందో చెప్పలేమని ఐసీఎంఆర్ తెలిపింది.