మద్యంప్రియులకు గుడ్ న్యూస్.. రాత్రి 8 గంటల వరకు వైన్ షాపులు

మద్యంప్రియులకు మరో గుడ్ న్యూస్. రాష్ట్రంలో నేటి (జూన్ 1) నుంచి మద్యం షాపులు రాత్రి 8 గంటల వరకు తెరిచి ఉంటాయి. తెలంగాణ రాష్ట్రంలో లాక్ డౌన్ నిబంధనలలో సడలింపులు ఇచ్చిన నేపథ్యంలో జూన్ 1 నుంచి లిక్కర్ షాపులను ఎనిమిది గంటల వరకు అమ్మకాలు సాగించేలా వెసులుబాటు కల్పించినట్లు అబ్కారీ శాఖ వెల్లడించింది. ఈ మేరకు ఆ శాఖ కమిషనర్‌ సర్ఫరాజ్‌ అహ్మద్‌ సోమవారం ఉత్తర్వులు జారీ చేశారు.

రాష్ట్రంలోని అబ్కారీ శాఖ అసిస్టెంట్‌ ఎక్సైజ్‌ సూపరింటెండెంట్లు, ఎక్సైజ్‌ సూపరింటెండెంట్లు, డిప్యూటీ కమిషనర్లు, జాయింట్‌ కమిషనర్లు, అదనపు కమిషనర్లకు సమాచారం ఇచ్చినట్లు ఉత్తర్వుల్లో పేర్కొన్నారు. నేటి నుంచి ఈ నిబంధన అమలయ్యేట్లు చూడాలని ఆదేశించారు.

రాష్ట్రంలో లాక్‌డౌన్‌తో మూతబడిన వైన్ షాపులు మే 6 నుంచి తెరుచుకున్న విషయం తెలిసిందే. మే 31వ తేదీ వరకు ఉదయం 10 గంటల నుంచి సాయంత్రం 6 గంటల వరకే మద్యం దుకాణాలు తెరిచి ఉంచడానికి అనుమతించారు. తాజాగా ఈ సమయాన్ని మరో రెండు గంటలు పెంచారు. సమయాన్ని పొడిగించడం వల్ల.. మద్యం అమ్మకాలు మరింత పెరిగేందుకు అవకాశం ఏర్పడుతుందని అటు మద్యం షాపుల నిర్వాహకులు, ఇటు ఆబ్కారీ శాఖ అధికారులు అంచనా వేస్తున్నారు.

Also Read: 14 పంటలకు మద్దతు ధర పెంపు.. రైతులకు కేంద్రం శుభవార్త

Must Read: అట్టుడుకుతున్న అమెరికా.. రహస్య బంకర్‌లోకి ట్రంప్