తెలంగాణలో భారీగా లాక్ డౌన్ సడలింపులు.. కఠినంగా కర్ఫ్యూ?

తెలంగాణలో కరోనా పాజిటివ్ కేసులు అదుపులోకి వచ్చాయి. కేసుల సంఖ్య తగ్గాయి. దీంతో ప్రభుత్వం లాక్ డౌన్ సడలింపులు చేస్తూ వచ్చింది. అయితే ప్రస్తుతం ప్రభుత్వం విధించిన లాక్ డౌన్ ఈనెల 19తో ముగియనుంది. 20వ తేదీ నుంచి సడలింపు సమయాన్ని పెంచాలని సర్కార్ భావిస్తుంది. ఇప్పటివరకు ఉదయం 6 గంటల నుంచి సాయంత్రం 6 వరకు సడలింపులు ఇచ్చారు. అయితే సడలింపు సమయాన్ని రాత్రి 9 గంటల వరకు పొడిగించాలని ప్రభుత్వం యోచిస్తోంది. రాత్రి 10 గంటల నుంచి ఉదయం 6 గంటల వరకు రాత్రి కర్ఫ్యూ అమలుపై కేబినెట్‌ భేటీలో సీఎం నిర్ణయం తీసుకునే అవకాశం ఉంది. లేదంటే మంత్రులతో మాట్లాడి ఆయన ప్రకటన చేసే అవకాశాలున్నాయి.

ప్రస్తుతం సడలింపులో భాగంగా ఉదయం 6 గంటల నుంచిసాయంత్రం 5 గంటల వరకు అన్ని రకాల వ్యాపార కార్యకలాపాలను అనుమతించడంతో పాటు ఆ తర్వాత ప్రజలు తమ గమ్యస్థానాలకు చేరుకోవడానికి మరో గంట సమ యం ఇస్తున్నారు. ఇక సాయంత్రం 6 గంటల నుంచి ఉదయం 6 గంటల వరకు కఠిన లాక్‌డౌన్‌ అమలు చేస్తున్నారు. అయితే ఈ నెల 19వ తేదీతో ప్రస్తుత లాక్‌డౌన్‌ ఉత్తర్వుల గడువు ముగియనుండటంతో, ఆ తర్వాత రాత్రి కర్ఫ్యూ మాత్రమే కొనసాగించాలనే ఆలోచనలో రాష్ట్ర ప్రభుత్వం ఉన్నట్లు తెలుస్తోంది.

లాక్ డౌన్ సడలింపు సమయాన్ని పొడిగించి ఉదయం 6 గంటల నుంచి రాత్రి 9 గంటల వరకు అన్ని రకాల కార్యకలాపాలను అనుమతించే అవకాశం ఉందని అధికార వర్గాలు చెబు తున్నాయి. ప్రజలు తమ గమ్య స్థానాలకు చేరుకోవడానికి రాత్రి 10 వరకు వెసులుబాటు కల్పించి, రాత్రి 10 గంటల నుంచి ఉదయం 6 గంటల వరకు కర్ఫ్యూ అమలు చేయాలని సర్కారు భావిస్తున్నట్టు సమాచారం. మరోవైపు రాష్ట్రంలో పలు చోట్ల మాత్రం లాక్ డౌన్ అమలు చేయనున్నారు. సత్తుపల్లి, మధిర, నల్లగొండ, నాగార్జునసాగర్, దేవరకొండ, మునుగోడు, మిర్యాలగూడ నియోజకవర్గాల్లో మరో 10 రోజుల పాటు ప్రస్తుత విధానంలోనే లాక్‌డౌన్‌ అమలు చేసేలా నిర్ణయం తీసుకునే అవకాశముంది.