హైవేపై లారీ బీభత్సం.. 4 కార్ల పైకి దూసుకెళ్లి బోల్తా

హైదరాబాద్-విజయవాడ రహదారిపై ఓ లారీ బీభత్సం సృష్టించింది. వేగంగా వచ్చి రోడ్డు పక్కన నిలిపి ఉన్న నాలుగు కార్లపైకి దూసుకెళ్లింది. ఈ ఘటన రంగారెడ్డి జిల్లా అబ్దుల్లాపూర్ మెట్‌లో గురువారం (ఆగస్టు 22) తెల్లవారు జామున 5 గంటలకు చోటు చేసుకుంది.

పోలీసులు తెలిపిన వివరాల ప్రకారం.. హైదరాబాద్ నుంచి విజయవాడ వైపు వెళుతున్న ఓ లారీ, అబ్దుల్లాపూర్‌మెట్‌ పరిధిలోని రామోజీ ఫిలిం సిటీ గేటు సమీపంలో ఓ చౌరస్తా వద్దకు చేరుకోగానే ఒక్కసారిగా అదుపు తప్పింది. ఒక కరెంట్ స్తంభాన్ని వేగంగా ఢీకొట్టింది. రోడ్డు పక్కనే ఉన్న పాన్ షాప్, టీ దుకాణాలపైకి దూసుకెళ్లి, ఓ హోటల్ ముందు పార్క్ చేసిన కార్లపై పల్టీ కొట్టింది.

Read Also: నగ్న చిత్రాలు పంపాలంటూ యువతికి వేధింపులు.. విద్యార్థి అరెస్టు

ఈ ఘటన వేకువ జామున జరగడంతో పెను ప్రమాదం తప్పింది. పాన్ షాప్, టీ దుకాణం, కార్లలో ఎవరూ లేకపోవడంతో ఎలాంటి ప్రాణ నష్టం జరగలేదు. లారీ బోల్తా పడటంతో ఒక బైకు, 4 కార్లు, టీ బండి పూర్తిగా ధ్వంసం అయ్యాయి. లారీ డ్రైవర్‌కు స్వల్ప గాయాలయ్యాయి.

ఘటనపై సమాచారం అందుకున్న అబ్దుల్లాపూర్ పోలీసులు ప్రమాదానికి కారణమైన డ్రైవర్‌ను అదుపులోకి తీసుకున్నారు. లారీ అతివేగం, డ్రైవర్‌కు నిద్రమత్తు రావడంతోనే ప్రమాదం చోటు చేసుకున్నట్లు పోలీసులు తెలిపారు.