తెలంగాణకి మరో బిగ్‌షాట్.. వందల కోట్ల పెట్టబడులు, ఉద్యోగాలు!

రాష్ట్రంలో భారీగా పెట్టుబడులు పెట్టేందుకు మరో కంపెనీ ముందుకొచ్చింది. జ్యూయలరీ రంగంలో అంతర్జాతీయ ఖ్యాతిగడించిన మలబార్ గ్రూప్ తెలంగాణలో తమ కంపెనీ ఏర్పాటుకు సంసిద్ధంత వ్యక్తం చేసింది. వందల కోట్ల రూపాయలతో మాన్యుఫ్యాక్చరింగ్ యూనిట్‌తో పాటు రిఫైనరీ ఏర్పాటు చేయనున్నట్లు మలబార్ గోల్డ్ అండ్ డైమండ్స్ కంపెనీ తెలిపింది. ఈరోజు మలబార్ గ్రూప్ అధినేత ఎంపీ అహ్మద్ సహా కంపెనీ సీనియర్ ఎగ్జిక్యూటివ్‌లు మంత్రి కేటీఆర్‌ని కలిసి తమ నిర్ణయాన్ని తెలియజేశఆరు.

రాష్ట్రంలో రూ.750 కోట్ల రూపాయల పెట్టుబడులు పెట్టనున్నట్లు మలబార్ గ్రూప్ పేర్కొంది. తమ కంపెనీ మాన్యుఫ్యాక్చరింగ్ యూనిట్‌తో పాటు గోల్డ్ రిఫైనరీ యూనిట్లను నెలకొల్పనున్నట్లు కంపెనీ ప్రతినిధులు తెలిపారు. సుమారు 2500 మందికి ఉపాధి అవకాశాలు లభిస్తాయని చెప్పారు. తెలంగాణ ప్రభుత్వం ఈజ్ ఆఫ్ డూయింగ్ బిజినెస్‌ని దృష్టిలో ఉంచుకొని ఇక్కడ పెట్టుబడులు పెట్టేందుకు ముందుకొచ్చిన మలబార్ గ్రూప్‌ ప్రతినిధులకు మంత్రి కేటీఆర్ కృతజ్ఞతలు తెలిపారు.

నైపుణ్యం కలిగిన స్వర్ణకారులు తెలంగాణ జిల్లాల్లో ఉన్నారని.. అలాంటి వారికి ఉపాధి అవకాశాలు లభించడం సంతోషించదగ్గ విషయమని కేటీఆర్ అన్నారు. కంపెనీ ఉద్యోగాల్లో స్థానికులను పరిగణలోకి తీసుకోవాలని ఆయన కోరారు. ప్రభుత్వం నుంచి అన్ని సహాయ సహకారాలు అందిస్తామని మంత్రి తెలియజేశారు.

Also Read: