మొదటి భార్యను మర్చిపోలేక.. బేగంపేటలో దారుణం

అతడికి 15 ఏళ్ల కిందటే ఓ మహిళతో పెళ్లైంది. కానీ, మనస్పర్థల కారణంగా ఆమె దూరమైంది. దీంతో మూడు నెలల కిందట మరో మహిళను రెండో వివాహం చేసుకున్నాడు. అయితే.. మొదటి భార్యను మరిచిపోలేక అతడు తరచూ ఆమె ప్రస్తావన తీసుకొచ్చేవాడు. ఆ విషయం నచ్చని రెండో భార్య అతడితో వాగ్వాదానికి దిగేది. దీంతో తరచూ ఘర్షణ చోటు చేసుకునేది. ఈ నేపథ్యంలో అతడు దారుణ నిర్ణయం తీసుకున్నాడు. భార్యను చంపి, తనూ ఆత్మహత్య చేసుకున్నాడు. హైదరాబాద్‌లోని బేగంపేటలో ఈ దారుణం చోటు చేసుకుంది.

Also Read: అక్క మీద కోపంతో కుక్కను చంపేశాడు..

బేగంపేట్ పోలీస్‌స్టేషన్‌ పరిధిలోని ఇందిరమ్మ నగర్‌లో నివాసం ఉంటున్న వెంకటేశ్‌, స్వప్నకు 3 నెలల కిందటే పెళ్లైంది. అయితే.. 15 ఏళ్ల కిందటే వెంకటేశ్‌కు మరో మహిళతో వివాహమైంది. మొదటి భార్యను మర్చిపోలేక వెంకటేశ్‌ తరచూ స్వప్నతో గొడవకు దిగేవాడు. ఈ కారణంగా వీరి మధ్య మనస్పర్థలు తలెత్తాయి. ఈ క్రమంలో బుధవారం (అక్టోబర్ 23) ఉదయం దంపతుల మధ్య ఘర్షణ చోటు చేసుకుంది.

భార్యాభర్తల మధ్య గొడవ ముదరడంతో వెంకటేశ్‌కు కోపం కట్టలు తెంచుకుంది. దీంతో అతడు తన భార్య స్వప్న మెడకు తాడు బిగించి ఊపిరి ఆడకుండా చేశాడు. ఆపై తలపై రోకలిబండతో కొట్టాడు. దీంతో ఆమె అక్కడికక్కడే కుప్పకూలి ప్రాణాలు విడిచింది. ఆ తర్వాత వెంకటేష్ ఉరి వేసుకుని బలవన్మరణానికి పాల్పడ్డాడు.

Must Read: హైదరాబాద్ మెట్రో ఆల్ టైమ్ రికార్డ్.. ఆర్టీసీ సమ్మె ఎఫెక్ట్

వెంకటేశ్, రక్తపుమడుగులో పడి ఉన్న స్వప్ప మృతదేహాలను గుర్తించిన స్థానికులు పోలీసులకు సమాచారం ఇచ్చారు. ఘటనా స్థలికి వచ్చిన పోలీసులు మృతదేహాలను స్వాధీనం చేసుకొని పోస్టుమార్టం నిమిత్తం ఆస్పత్రికి తరలించారు. ఘటనపై కేసు నమోదు చేసుకొని దర్యాప్తు చేస్తున్నారు.