ఆమె లేకపోతే సచ్చిపోతా సార్.. సెల్ టవర్ ఎక్కిన యువకుడు

ప్రేమించి పెళ్లి చేసుకున్న అమ్మాయిని తనకు దూరం చేశారంటూ ఓ యువకుడు సెల్ టవర్ ఎక్కడం రంగారెడ్డి జిల్లా ఆమనగల్‌‌లో కలకలం సృష్టించింది. పదేళ్లుగా ప్రాణం కంటే మిన్నగా ప్రేమించి పెళ్లి చేసుకున్న యువతిని పోలీసులు విడదీశారని బాధితుడు ఆరోపించాడు. అమ్మాయితో మాట్లాడించకపోతే సెల్ టవర్ పైనుంచి దూకి ఆత్మహత్య చేసుకుంటానని ఆవేదన వ్యక్తం చేశాడు. ఈ మేరకు బాధితుడి పేరుతో విడుదలైన ఓ వీడియో సోషల్ మీడియాలో చక్కర్లు కొడుతోంది.

ఆమన్‌గల్‌కు చెందిన పాండు ఓ యువతిని ప్రేమించాడు. కులాలు వేరు కావడంతో వీరి పెళ్లికి పెద్దలు ఒప్పుకోలేదు. దీంతో పెద్దలను ఎదిరించి అతడు ఓ ఆలయంలో ఆ యువతి మెడలో తాళి కట్టాడు. రెండు నెలల కిందట ఈ పెళ్లి జరిగినట్లు తెలుస్తోంది. తమ కుమార్తెను పాండు కిడ్నాప్ చేశాడని యువతి తరఫు కుటుంబసభ్యులు పోలీసులకు ఫిర్యాదు చేశారు. వారం కిందట పాండును పోలీస్ స్టేషన్‌కు పిలిపించి కౌన్సిలింగ్ ఇచ్చిన పోలీసులు.. ఆ అమ్మాయిని ఆమె తల్లిదండ్రులతో పంపించారు.

నాటి నుంచి తన భార్యతో మాట్లాడించడంలేదని, ఆమెను తనకు కాకుండా చేస్తున్నారని పాండు గోడు వెల్లబోపుకున్నాడు. స్థానిక ఎమ్మెల్యే, యువతి గ్రామానికి చెందిన సర్పంచ్ ప్రోద్బలంతో పోలీసులు ఇలా చేస్తున్నారంటూ అతడు ఆరోపించాడు. పోలీసుల తీరుతో మనస్తాపం చెంది శనివారం (జనవరి 11) ఉదయం ఆమన్‌గల్ మండల కేంద్రంలో సెల్‌ఫోన్ టవర్ ఎక్కాడు. తనకు న్యాయం చేయకపోతే అక్కడ నుంచి దూకి చనిపోతానని తెలిపాడు.

ఎవరి కోసం బతకాలి?
‘నేను చనిపోవాలనుకుంటున్నా.. ఎవరి కోసం బతకాలి? జీవితంలో అన్నీ కాదనుకొని ఆమెను పెళ్లి చేసుకున్నా.. చివరికి నాకు ఈ గతి తెచ్చారు. 10 సంవత్సరాల నుంచి నేను నమ్మిన అమ్మాయి, నా భార్య చెప్తున్న మాటలేనా అవి.. లేకపోతే.. నేతల ప్రోద్బలంతో పోలీసులు చెప్పిస్తున్నారా? సర్పంచి రాజకీయ అండదండలతో నాకు ఆ అమ్మాయిని దూరం చేస్తున్నారా? అర్థం కావట్లేదు సార్..’ అంటూ బాధితుడు ఆవేదన వ్యక్తం చేశాడు.

‘అమ్మాయి లేకపోతే సచ్చిపోతా సార్.. నాకు బతకాలనుంది సార్.. కులాంతర వివాహం చేసుకుంటే తప్పా సార్.. ప్రభుత్వాలే ప్రోత్సహిస్తున్నాయి కదా సార్.. ఎక్కడికైనా దూరం వెళ్లి బతుకుతాం సార్.. ఆమెకు ఏం జరిగినా పూర్తి బాధ్యత వహిస్తా సార్.. ఆమె లేకపోతే బతకలేను సార్.. నాతో మాట్లాడించండి.. లేకపోతే ఈ సెల్ టవర్ నుంచి దూకి చనిపోతా..’ అంటూ బాధితుడు వీడియోలో పేర్కొన్నాడు. అయితే.. ఆ వీడియో బాధితుడిదేనా, ఎవరైనా మార్ఫింగ్ చేశారా అనే అనుమానాలు కలుగుతున్నాయి.