కోటిన్నరకు అలుగు బేరం.. అడ్డం తిరిగిన కథ.. చివరకు ఇలా..!

కరోనా వైరస్ మహమ్మారి ప్రపంచాన్ని తాకిన వేళ.. పాంగోలిన్ అని పిలిచే అలుగు గురించి ప్రపంచం మొత్తానికి తెలిసింది. కరోనా వ్యాప్తికి ఇవే కారణమనే ప్రచారం జరిగింది. ఎవరికీ ఎలాంటి హాని తలపెట్టని ఈ జీవులను చైనా లాంటి కొన్ని దేశాల్లో ఆహారంగా తీసుకుంటారు. వీటిని క్యానర్స్ వ్యాధిని నియంత్రించే ఔషధాల తయారీకి ఉపయోగిస్తారు. వీటిపై ఉండే పొలుసులను చైనా సంప్రదాయ వైద్యంలో వాడతారు. అందుకే అలుగుకు బ్లాక్ మార్కెట్లో మంచి డిమాండ్ ఉంది.

మంచిర్యాల జిల్లా కాసిపేటలో అలుగును పట్టుకున్న 8 మంది సభ్యుల ముఠా.. దాన్ని విక్రయించేందుకు ప్రయత్నిస్తుండగా.. పోలీసులు అరెస్ట్ చేశారు. మధ్యవర్తుల ద్వారా మూగజీవిని కోటిన్నరకు విక్రయించేందుకు బేరం కుదుర్చుకున్నట్లు సమాచారం అందుకున్న టాస్క్‌ఫోర్స్ పోలీసులు.. అటవీ సిబ్బందితో కలిసి దాడి చేసి పట్టుకున్నారు. బెల్లంపల్లి మండలంలోని బుగ్గగుట్ట అడవిలో అలుగును పట్టుకున్నట్టు నిందితులు తెలిపారు.

తెలుగు రాష్ట్రాల్లో అలుగును అక్రమంగా విక్రయించడానికి ప్రయత్నించడం ఇదే తొలిసారికాదు. గత ఏడాది ఆగస్టులో సిర్పూర్‌లో ఫారెస్ట్ అధికారులు అలుగును తరలిస్తోన్న 12 మందిని అరెస్ట్ చేశారు. గుంటూరు జిల్లాలో అలుగును పట్టుకొని.. యూట్యూబ్‌లో వీడియో పెట్టి.. రూ.65 లక్షలకు బేరం కుదుర్చుకున్న ముఠాను గత ఏడాది జులైలో అదుపులోకి తీసుకున్నారు.