హైదరాబాద్: జలమండలి సిబ్బంది నిర్లక్ష్యం.. పెద్ద ఎత్తున నష్టం

హైదరాబాద్‌లో జలమండలి అధికారుల నిర్లక్ష్యం బయటపడింది. మంజీరా తాగునీటి పైపులైన్ మరమ్మతుల పనులు పూర్తి కాకుండానే అధికారులు నీటిని సరఫరా చేశారు. దీంతో గత అర్ధరాత్రి రెండు గంటల నుంచి మంజీర నీరు లీకై మదీనాగూడ జాతీయ రహదారి పక్కన మహాలక్ష్మి ఆర్కేడ్, స్పెన్సర్స్ భవనాల సెల్లార్‌లో నిండిపోయాయి. అపార్ట్‌మెంట్లలో నివాసం ఉంటున్న వారికి విషయం తెలిసేలోపే సెల్లార్‌లో 8 అడుగుల మేర నీటిమట్టం నిండిపోయింది. దీంతో 70 కార్లు, 100 ద్విచక్ర వాహనాలు నీట మునిగి భారీ నష్టం ఏర్పడింది.

సెల్లార్‌లో నీటి మట్టం బాగా పెరగడంతో మహాలక్ష్మి ఆర్కేడ్ అపార్ట్‌మెంట్ సెల్లార్‌లో నివాసం ఉంటున్న వాచ్‌మెన్ కుటుంబానికి ప్రమాదం ఏర్పడింది. పరిస్థితి గమనించి వారు ముందుగానే సెల్లార్ నుంచి బయటకు వచ్చేశారు. ఈ ఘటన నేపథ్యంలో జలమండలి తీరుపై అపార్ట్‌మెంట్ వాసులు ఆగ్రహం వ్యక్తం చేస్తున్నారు. నీటిపై సెల్లార్‌లో ఉన్న సిలిండర్లు, ఇతర గృహోపకరణాలు తేలుతున్నాయి. అధికారులు స్పందించి పంపులు ఏర్పాటు చేసి నీటిని తోడే ప్రక్రియ చేపట్టారు.