అన్నతో మాట్లాడటం మానేశా.. మారుతీరావు సోదరుడు

మిర్యాలగూడ మారుతీరావు ఆత్మహత్య అనంతరం తనపై ఆరోపణలు వస్తున్న నేపథ్యంలో ఆయన సోదరుడు తిరునగరి శ్రవణ్ స్పందించారు. అన్నతో తనకు ఎలాంటి విభేదాలు లేవని స్పష్టం చేశారు. ఆయనతో ఎలాంటి ఆస్తి వివాదాలు కూడా లేవని తెలిపారు. ప్రణయ్ హత్య కేసుతో తనకు ఎలాంటి సంబంధం లేదని.. అయినా జైలు శిక్ష అనుభవించానని ఆవేదన వ్యక్తం చేశాడు. దీంతో మనస్తాపానికి గురైన తాను గత ఏప్రిల్ నుంచి తన సోదరుడితో మాట్లాడటం మానేసినట్లు చెప్పారు.

మారుతీరావుతో తనకు ఆర్థిక లావాదేవీలు కూడా లేవని శ్రవణ్ తెలిపారు. ఆయనతో వ్యక్తిగత సంబంధాలు కూడా లేవని చెప్పారు. కేసు ట్రయిల్ దశకు వచ్చిందని.. దాని వల్లే ఒత్తిడికి గురై ఆత్మహత్యకు పాల్పడి ఉంటారని ఆయన చెప్పుకొచ్చారు. ‘ఈ రోజు అన్నయ్య ఆత్మహత్య చేసుకున్నాడనే విషయం తెలియగానే షాక్‌కు గురయ్యాను. వెంటనే మా వదినను తీసుకొని నేరుగా ఉస్మానియా ఆస్పత్రికి వచ్చాను’ అని శ్రవణ్ చెప్పారు.

Also Read: మారుతీరావు ఆత్మహత్య: వీలునామానే కొంపముంచిందా? సంచలన అనుమానాలు

సంచలనం సృష్టించిన మిర్యాలగూడ పెరుమాళ్ల ప్రణయ్ హత్య కేసులో ప్రధాన నిందితుడైన మారుతీ రావు ఆదివారం (మార్చి 8) హైదరాబాద్‌లోని ఆర్య వైశ్యా భవన్‌లో ఆత్మహత్య చేసుకొని మరణించిన విషయం తెలిసిందే. మారుతీరావు మరణించాడని తెలియగానే ఆయన భార్య గిరిజను తీసుకొని శ్రవణ్ హైదరాబాద్ వచ్చారు. మారుతీరావు మృతదేహాన్ని చూడగానే ఆయన భార్య కన్నీటిపర్యంతమయ్యారు. చేతులతో బాదుకుంటూ గుండెలు అవిసేలా ఆమె రోదించిన తీరు అక్కడున్నవారందరినీ కలచివేసింది.

ఆత్మహత్య చేసుకునే ముందు మారుతీరావు రెండు లైన్లలో సూసైడ్ నోట్ రాశారని తెలుస్తోంది. ‘గిరిజా క్షమించు.. అమృతా అమ్మ దగ్గరికి వెళ్లిపో’ అని ఆయన రాసి పెట్టినట్లు సమాచారం.

Also Read: 12 ఏళ్ల బాలికపై పక్కింటి యువకుడి అఘాయిత్యం