Telangana: తెలంగాణ ప్రజలకు వాతావరణశాఖ హెచ్చరిక.. రాబోయే ఐదు రోజుల పాటు తీవ్ర ఎండలు

Telangana: తెలంగాణలో ఇప్పటికే భానుడు సెగలు కక్కుతున్నాడు. ఎండ ప్రతాపానికి ప్రజలు సతమతమవుతున్నారు. ఎండ ప్రభావంతో పాటు తీవ్ర వడగాల్పులు, ఉదయం నుంచి ఉక్కబోత వస్తుండటంతో జనాలు ఉక్కిరిబిక్కిరి అవుతున్నారు. ఎండల తీవ్రతతో రోడ్లపైకి జనాలు రావడం తగ్గిపోయింది. అత్యవసరమైతే తప్ప ప్రజలు బయటకు రావడం లేదు. దీంతో మధ్యాహ్నం వేళల్లో రోడ్లన్నీ ఖాళీగా దర్శనమిస్తున్నాయి.ఈ క్రమంలో ప్రజలకు హైదరాబాద్ వాతావరణ కేంద్రం హెచ్చరికలు జారీ చేసింది. రాబోయే మూడు రోజుల పాటు రాష్ట్రంలో అధిక ఉష్ణోగ్రతలు నమోదయ్యే అవకాశముందని, అవసరమైతే తప్ప బయటకు వెళ్లవద్దని తెలిపింది. ఈ మేరకు పలు జిల్లాలకు ఎల్లో, ఆరెంజ్ అలర్ట్ జారీ చేసింది. నేడు ఆదిలాబాద్, కొమురంభీం ఆసిఫాబాద్, నిర్మల్, జగిత్యాల, మంచిర్యాల, నిజామాబాద్, పెద్దపల్లి, కరీంనగర్, జనగాం, వరంగల్, మహబూబ్‌నగర్, నల్లగొండ, భద్రాద్రి కొత్తగూడెం, రాజన్న సిరిసిల్ల, సూర్యాపేట, ఖమ్మం, ములుగు జిల్లాలకు ఆరెంజ్ అలర్ట్ జారీ చేసింది. ఇక మిగతా జిల్లాలకు ఎల్లో అలర్ట్ జారీ చేశారు.

18వ తేదీ నల్లగొండ, ఖమ్మం, సూర్యాపేట, జనగాం, మహబూబ్‌నగర్, వరంగల్ జిల్లాలకు ఆరెంజ్ అలర్ట్ జారీ చేయగా.. మిగతా జిల్లాలకు వాతావరణశాఖ ఎల్లో అలర్ట్ జారీ చేసింది. 19వ తేదీ రాష్ట్రంలోని అన్ని జిల్లాలకు ఎల్లో అలర్ట్ ఇచ్చారు. 20వ తేదీ ఆదిలాబాద్, కొమరంభీం ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, నిర్మల్ జిల్లాలకు, 21వ తేదీ సూర్యాపేట, ఖమ్మం, భద్రాది కొత్తగూడెం, వరంగల్, మహబూబ్ నగర్, జనగాం, రాజన్న సిరిసిల్ల, నిజామాబాద్, కరీంనగర్, నిర్మల్, కొమరం భీం జిల్లాలకు ఆరెంజ్ అలర్ట్ జారీ చేశారు.

ఉష్ణోగ్రతలు 41 డిగ్రీల నుంచి 44 డిగ్రీల మధ్య నమోదయ్యే అవకాశముంటే ఆరెంజ్ అలర్ట్.. 36 నుంచి 40 డిగ్రీల మధ్య ఉండే అవకాశం ఉంటే ఎల్లో అలర్ట్ జారీ చేస్తారు. 45 డిగ్రీలకుపైగా ఉష్ణోగ్రతలు నమోదయ్యే అవకాశముందని అంచనా వేస్తే.. రెడ్ అలర్ట్ జారీ చేస్తారు. మంగళవారం నల్లగొండలో అత్యధిక ఉష్ణోగ్రత 43.5 డిగ్రీలు నమోదవ్వగా.. అత్యల్ప ఉష్ణోగ్రత పటాన్‌చెర్వులో 21 డిగ్రీలు నమోదైంది. హైదరాబాద్‌లో గరిష్టం 39.8, కనిష్టం 26.5, రామగుండంలో గరిష్టం 42.6, కనిష్టం 26.3, నల్లగొండలో గరిష్టం 43.5, కనిష్టం 25.0, నిజామాబాద్‌లో గరిష్టం 41.3, కనిష్టం 28.0 డిగ్రీలు నమోదైంది. ఆదిలాబాద్‌లో గరిష్టం 41.8, కనిష్టం 26.7, భద్రాచలంలో గరిష్టం 43.2, కనిష్టం 28.0 డిగ్రీలు, హనుమకొండలో గరిష్టం 41.9, కనిష్టం 27.0 డిగ్రీలు నమోదైంది.