కృష్ణా పరివాహక ప్రాంతంలో వరుస భూప్రకంపనలు.. భయపడుతున్న జనం

సూర్యాపేట జిల్లాలో కృష్ణా నది పరివాహక ప్రాంతంలో తరచుగా భూప్రకంపనలు నమోదవుతున్నాయి. రోజుకు 20 సార్లు ప్రకంపనలు వస్తుండటంతో.. బలంగా ఉన్న ఇళ్ల గోడలు సైతం బీటలు వారుతున్నాయి. దీంతో జనం భయపడుతున్నారు. భూమి కంపించిన సమయంలో ఉన్న ఫళంగా ఇంటి నుంచి బయటకు పరిగెడుతున్నారు. చింతపాలెం మండలంలో ప్రకంపనలు ఎక్కువగా నమోదవుతున్నాయి.

ఈ ఏడాది జనవరి 26న తెల్లవారు జామున రిక్టర్ స్కేల్ పై 4.6 తీవ్రతో భూమి కంపించింది. గత 50 ఏళ్లలో రాష్ట్రంలో ఈ స్థాయిలో భూప్రకంపనలు నమోదు కావడం ఇదే తొలిసారి కావడం గమనార్హం. జనవరి నెలలో 300 సార్లు భూమి కంపించింది. ఈ నెలలో ప్రకంపనలు చోటు చేసుకుంటున్నాయి. దీంతో జనం భయాందోళనలకు గురవుతున్నారు.

తరచుగా ప్రకపంనలు వస్తుండటంతో.. చింతలపాలెం మండలంలోని దొండపాడు గవర్నమెంట్ స్కూల్‌లో, పాత వెల్లటూరులో భూకంప నమోదు కేంద్రాలను ఏర్పాటు చేశారు. భూమి లోపల ఏడు కిలోమీటర్ల లోతులోని పొరల్లో పగుళ్లు ఏర్పడటం వల్ల ఈ ప్రకంపనలు తలెత్తుతున్నాయని శాస్త్రవేత్తలు చెబుతున్నారు.