ఇదంతా స్కెచ్.. రాజీనామాపై ఈటల సంచలన వ్యాఖ్య, KCR బర్తరఫ్ చేస్తే అంటూ..

తన మొత్తం రాజకీయ చరిత్ర, ఆస్తులపై విచారణ జరిపించుకోవాలని మంత్రి ఈటల రాజేందర్ ప్రభుత్వానికి సవాలు విసిరారు. తాను తప్పు చేసి ఉంటే ఏ శిక్షకైనా సిద్ధమేనని, సన్యాసం కూడా పుచ్చుకుంటానని అన్నారు. ‘‘ఉన్నతాధికారులు, సిట్టింగ్ జడ్జితో కూడా కమిటీ వేసుకోవచ్చు. ఈ ప్రభుత్వం నుంచి 5 పైసలు కూడా తీసుకోలే. నిరూపిస్తే ముక్కు నేలకు రాస్తా. ఈ చిల్లర రాజకీయాలకు ఈటల రాజేందర్ లొంగిపోడు. ఆస్తులు, పదవుల కోసం నేను లొంగిపోను. నా ఆత్మ గౌరవం కంటే ఈ పదవి గొప్పది కాదు. 20 ఏళ్లలో ఏనాడూ తప్పు చేయలేదు. సీఎం ఈ విషయంలో పూర్తి స్థాయిలో విచారణ జరిపి సమాజానికి నిజాలు చూపించాలి.’’ అని ఈటల అన్నారు.

తనపై వచ్చిన భూ కబ్జా ఆరోపణలపై మంత్రి ఈటల రాజేందర్ శుక్రవారం హైదరాబాద్‌లో స్పందించారు. ఆ ఆరోపణలపై వివరణ ఇచ్చారు. పౌల్ట్రీకి ల్యాండ్ ఎక్కువగా కావాలని, విస్తరణ కోసం పరిశ్రమల శాఖకు అప్పట్లో లేఖ రాశానని వివరించారు. కెనరా బ్యాంకు ద్వారా తన పరిశ్రమ విస్తరణ కోసం రూ.వంద కోట్ల రుణం తీసుకున్నట్లు వివరించారు. అది వ్యవసాయ భూమి కాదని, రైతులు స్వచ్ఛందంగా సరెండర్ చేస్తే, ఇండస్ట్రియల్ కార్పొరేషన్ ద్వారా ఇవ్వొచ్చని చెప్పారని అన్నారు. ముందస్తు ప్రణాళికతో తనపై దుష్ప్రచారం చేశారని, కట్టుకథలు అల్లారని ఆరోపించారు. ఒక ఎకరం కూడా తన స్వాధీనంలో లేదన్నారు. తనపై వచ్చిన ఆరోపణలకు రాజీనామా చేస్తారా అని ఓ విలేకరి ప్రశ్నించగా.. ఈ విచారణ తేలాక ఆలోచిస్తానని మంత్రి సమాధానం ఇచ్చారు.

‘‘1986లో పెట్టిన కోళ్ల ఫారాన్నే ఇప్పటికీ అదే నడుపుతున్నాం. కేసీఆర్ ఆ నాడు నన్ను బంజారాహిల్స్‌లో భూమి కొనుక్కొని ఇల్లు కొనుక్కోమన్నారు. 2,100 గజాలు కొన్నా. ఆ భూమి కిరికిరిలో ఉంటే శ్రీధర్ బాబు, కోమటిరెడ్డి గారు మద్దతు ఇచ్చారు. కానీ సఫలం కాలేదు. ఇప్పటికీ కూడా నాకు ఆ భూమి చెందలేదు. 2007లో అప్పుడు 5 కోట్ల పెట్టుబడి పెట్టా. ఈటల రాజేందర్ భూమి కోల్పోయినా పర్వాలేదు కానీ, ఆత్మను అమ్ముకోడు.’’ అని ఈటల వివరణ ఇచ్చారు.