ఈ కనిపించే దేవుళ్లు దేశానికే ఆదర్శం.. హరీశ్‌రావు ఆసక్తికర ట్వీట్

హైదరాబాద్‌లోని గాంధీ ఆస్పత్రిలో చికిత్స పొందుతున్న కరోనా బాధితురాలైన ఓ గర్భిణి శుక్రవారం పండంటి మగ బిడ్డకు జన్మనిచ్చిన సంగతి తెలిసిందే. ప్రత్యేక జాగ్రత్తలతో గర్భిణికి గైనకాలజీ విభాగం వైద్యులు సిజేరియన్ చేసి బిడ్డను బయటకు తీశారు. కాగా, ప్రస్తుతం తల్లీ బిడ్డ ఇద్దరూ క్షేమంగానే ఉన్నారని మంత్రి ఈటల రాజేందర్ శుక్రవారం సాయంత్రం (మే 8) నిర్వహించిన విలేరుల సమావేశంలో ప్రకటించారు. అయితే, ఈ ఘటనపై ఆర్థికశాఖ మంత్రి హరీశ్ రావు కూడా స్పందించారు. ఈ మేరకు శుక్రవారం రాత్రి ట్వీట్ చేశారు. కరోనా సోకిన మహిళకు సురక్షితంగా పురుడు పోసిన వైద్యులపై ప్రశంసల జల్లు కురిపించారు. అంతేకాక కరోనా రోగులకు చికిత్స చేస్తున్న వైద్యులను ‘కనిపించే దైవాలు’గా మంత్రి హరీశ్ రావు అభివర్ణించారు. కరోనా సోకి చికిత్స పొందుతున్న ఈ మహిళ పండంటి బిడ్డకు జన్మనిచ్చిన ఈ అరుదైన ఘటనపై నెటిజన్లు కూడా బాగా స్పందిస్తున్నారు. వైద్యుల కృషిని అభినందిస్తున్నారు.