Mekapati Goutham Reddy Death: మేకపాటి హఠాన్మరణంపై మంత్రుల దిగ్భ్రాంతి.. నమ్మలేకపోతున్న సోదరా అంటూ కేటీఆర్ ట్వీట్

ఏపీ పరిశ్రమలు, ఐటీ శాఖ మంత్రి మేకపాటి గౌతమ్‌రెడ్డి (50) హఠాన్మరణం చెందారు. ఇవాళ ఉదయం గుండెపోటు రావడంతో హైదరాబాద్‌లోని అపోలో ఆస్పత్రిలో చేరిన ఆయన.. అత్యవసర విభాగంలో చికిత్స పొందుతూ తుదిశ్వాస విడిచారు.. మేకపాటి హఠాన్మరణంపై పలువురు ప్రముఖులు తీవ్ర దిగ్భ్రాంతి వ్యక్తం చేస్తున్నారు. ఆయన కుటుంబ సభ్యులకు ప్రగాఢ సానుభూతి తెలియజేస్తున్నారు.

మేకపాటి హఠాన్మరణంపై తెలంగాణ ఐటీ, పరిశ్రమల శాఖ మంత్రి కేటీఆర్ తీవ్ర దిగ్భ్రాంతి వ్యక్తం చేశారు. మేకపాటి మరణవార్త విని షాక్‌కు గురైనట్లు పేర్కొన్నారు.. ‘ప్రియ మిత్రుడి మరణం గురించి తెలిసి చాలా బాధపడుతున్నా.. మేకపాటి గౌతమ్‌ మరణాన్ని ఇప్పటికీ నమ్మలేకపోతున్నా.. ఆయన కుటుంబ సభ్యులకు, స్నేహితులకు నా ప్రగాడ సానుభూతి తెలియజేస్తున్నాను. చాలా త్వరగా వెళ్లిపోయారు సోదరా.. మీ ఆత్మకు శాంతి కలగాలని ప్రార్థిస్తున్నాను’ అని కేటీఆర్ ట్వీట్ చేశారు.


మేకపాటి మృతిపై మంత్రి తలసాని శ్రీనివాస్ యాదవ్ కూడా సంతాపం తెలిపారు. ఏపీ మంత్రి గౌతమ్‌ రెడ్డి మృతి చాలా బాధాకరమన్నారు. ఆయన కుటుంబ సభ్యులకు మంత్రి తలసాని తన ప్రగాఢ సానుభూతిని తెలిపారు. అసెంబ్లీ స్పీకర్ పోచారం శ్రీనివాస రెడ్డి తీవ్ర దిగ్భ్రాంతి వ్యక్తం చేశారు. గౌతమ్ రెడ్డి ఆత్మకు శాంతి చేకూరాలని ప్రార్థించారు. ఆయన కుటుంబ సభ్యులకు పోచారం ప్రగాఢ సానుభూతి తెలిపారు.. చిన్న వయసులోనే మేకపాటి మరణించడం బాధాకరమని మంత్రి ఇంద్రకరణ్ రెడ్డి అన్నారు. విద్యా శాఖ మంత్రి పి.సబితా ఇంద్రారెడ్డి దిగ్భ్రాంతి వ్యక్తం చేశారు. ఈ సందర్భంగా ఆయన కుటుంబ సభ్యులకు తన ప్రగాఢ సానుభూతిని తెలిపారు. సమర్థవంతమైన మంత్రిగా గుర్తింపు పొందిన గౌతమ్ రెడ్డి అకాల మరణం చెందడం బాధాకరమని మంత్రి వెల్లడించారు.

ఇటు కాంగ్రెస్ నేతలు కూడా స్పందించారు. మేకపాటి గౌతమ్ రెడ్డి మృతి పట్ల టీపీసీసీ చీఫ్ రేవంత్ రెడ్డి ప్రగాఢ సంతాపం తెలిపారు. మేకపాటి అకాల మరణం తనను కలచివేసిందని, మంచి రాజకీయ భవిష్యత్ ఉన్న నేత చిన్న వయసులోనే కన్ను మూశారని ఆవేదన చెందారు. గౌతమ్ రెడ్డి మృతి పట్ల ఎంపీ కోమటిరెడ్డి వెంకట్ రెడ్డి కూడా తన ప్రగాఢ సానుభూతి తెలిపారు.