Paddy: యాసంగిలో వరిసాగొద్దు.. వాళ్లకు ఓకే.. వ్యవసాయ మంత్రి కీలక ప్రకటన

రైతన్నలకు షాకిచ్చింది కేసీఆర్ సర్కార్. యాసంగిలో వరిసాగు వద్దని కేసీఆర్ సర్కార్ తేల్చిచెప్పింది. వరి సాగు చేయొద్దని.. తర్వాత కొనలేదని ప్రభుత్వాన్ని బదనాం చేయొద్దని స్పష్టం చేసింది. కొద్దిరోజులుగా వరిసాగుపై జరుగుతున్న ప్రచారంపై ఈ రోజు వ్యవసాయ మంత్రి సింగిరెడ్డి నిరంజన్ రెడ్డి క్లారిటీ ఇచ్చారు. మంత్రుల నివాస సముదాయంలో మీడియాతో మాట్లాడుతూ యాసంగిలో వరి సాగు చేయొద్దని ఆయన రైతులకు విజ్ఞప్తి చేశారు. వడ్లు కొనే పరిస్థితి లేదని.. ఆ తర్వాత ప్రభుత్వం కొనడం లేదని బదనాం చేయొద్దని ఆయన సూచించారు.

రైతు కోసం సీఎం కేసీఆర్, టీఆర్‌ఎస్ ప్రభుత్వం పడుతున్న తపన మరే రాష్ట్ర ప్రభుత్వం పడదని మంత్రి అన్నారు. అందుకే ఇక్కడ రైతుకి మంచి జరిగే పథకాలు ఉన్నాయని.. ఇతర రాష్ట్రాల్లో అలాంటి పథకాలు లేవన్నారు. యాసంగిలో వరి ధాన్యం కొనుగోలు చేయలేమని కేంద్ర స్పష్టం చేసిందని.. రాష్ట్ర ప్రభుత్వాన్ని బదనాం చేయాలని చూస్తోందని ఆయన విమర్శించారు. కేంద్రం కొనకపోతే రాష్ట్రాలు ఎలా కొంటాయని.. రాష్ట్రాలకు ఎక్స్‌పోర్ట్ అనుమతులు ఉండవని మంత్రి తెలిపారు.

వానాకాలంలో పండించిన వడ్లు ప్రభుత్వం కొనుగోలు చేస్తుందని.. యాసంగిలో కొనుగోలు చేయదని నిరంజన్ రెడ్డి స్పష్టం చేశారు. రైతులు ఇతర పంటలు సాగు చేయాలని ఆయన కోరారు. విత్తన కంపెనీలతో ఒప్పందం చేసుకున్న రైతులు, రైస్ మిల్లర్లతో ఒప్పందాలు చేసుకున్నవారు వరి సాగు చేసుకోవచ్చని మంత్రి తెలిపారు. రైతులు ఇబ్బందులు పడకూడదనే ముందస్తుగా చెబుతున్నామని ఆయన అన్నారు. వ్యవసాయ ఉత్పత్తులు కొనాల్సిన బాధ్యత కేంద్రానిదేనని.. కానీ కేంద్రంలో అధికారంలో ఉన్నవారు రాష్ట్ర ప్రభుత్వాన్ని బదనాం చేయాలని చూస్తున్నారని ఆయన అభ్యంతరం వ్యక్తం చేశారు.

Also Read: