దేత్తడి హరిక నియామకం అలా జరిగింది.. క్లారిటీ ఇచ్చిన మంత్రి

తెలంగాణ పర్యటకశాఖకు బిగ్ బాస్ ఫేం దేత్తడి హరికను బ్రాండ్ అంబాసిడర్‌గా నియమించిన వ్యవహారం గత మూడు రోజులుగా హాట్ టాపిక్ అయిన సంగతి తెలిసిందే. పర్యటక శాఖ మంత్రికి, సీఎం కార్యాలయానికి కూడా తెలవకుండా ఆ నియామకం ఎలా జరిగిందని మంత్రి కేటీఆర్ సైతం అసహనం వ్యక్తం చేసినట్లు వార్తలు వచ్చాయి. పర్యటకశాఖ మంత్రి వి.శ్రీనివాస్ గౌడ్ కూడా ఆ విషయంపై తనకు అవగాహన లేదని చెప్పారు. అయితే, గురువారం కూడా మంత్రి ఈ విషయంపై మాట్లాడారు. హారికకు అపాయింట్ మెంట్ ఎలా ఇచ్చారో తనకు తెలియదని మంత్రి శ్రీనివాస్ గౌడ్ స్పష్టం చేశారు.

దేత్తడి హరిక నియామకంపై మంత్రి శ్రీనివాస్ గౌడ్ గురువారం మాట్లాడుతూ.. కొత్తగా ఛైర్మెన్ కదా తెలియక చేశాడని టూరిజం కార్పోరేషన్ చైర్మెన్ ఉప్పల శ్రీనివాస్ గుప్తా గురించి వ్యాఖ్యానించారు. ‘‘ఏం జరిగిందో, అపాయింట్ మెంట్ ఎలా ఇచ్చారో తెలియదు. కూర్చొని మాట్లాడుకొని ఇబ్బంది లేకుండా చూసుకొంటాం’’ అని మంత్రి స్పష్టం చేశారు.

శ్రీనివాస్ గుప్తాతో తమకు ఎలాంటి విభేదాలు లేవని చెప్పారు. కమిటీ వేసి అందరూ ఓకే అనుకొంటే హరికను కొనసాగిస్తామని ఆయన ప్రకటించారు. సీఎం దృష్టికి ఈ విషయాన్ని తీసుకెళ్లి పరిష్కరించుకొంటామని ఆయన వివరించారు. ఇలా వివాదం నడుస్తుంటే మరోవైపు బ్రాండ్ అంబాసిడర్ పదవి నుంచి తాను తప్పుకొంటున్నట్టుగా హరిక ప్రకటించిన సంగతి తెలిసిందే. గురువారమే ఆమె సోషల్ మీడియా వేదికగా ఈ విషయాన్ని స్పష్టం చేశారు.