KTR కాన్వాయ్‌కు అడ్డుపడిన వారికి అండగా మంత్రి శ్రీనివాస్ గౌడ్

మంత్రి కేటీఆర్ మహబూబ్‌నగర్ జిల్లా పర్యటన సందర్భంగా ఆయన కాన్వాయ్‌కు అడ్డుపడిన కుటుంబానికి మంత్రి శ్రీనివాస్ గౌడ్ అండగా నిలిచారు. పేదలకు అన్యాయం చేస్తే సహించబోమని హెచ్చరించారు. ఈ ఘటన వివరాల్లోకి వెళ్తే.. మున్సిపల్ శాఖ మంత్రి కేటీఆర్ జులై 13న మహబూబ్‌నగర్‌లో పర్యటించిన సంగతి తెలిసిందే. వీరన్నపేటలో డబుల్ బెడ్రూం ఇళ్లను ప్రారంభించిన మంత్రి తిరుగు ప్రయాణం అవుతుండగా.. అదే ప్రాంతానికి చెందిన గంటేల వెంకటేష్ కుటుంబం కేటీఆర్ కాన్వాయ్‌కు అడ్డుపడింది.

పక్కనే ఉన్న మంత్రి శ్రీనివాస్ గౌడ్ మీ సమస్యను తాను పరిష్కరిస్తానని హామీ ఇచ్చారు. అన్నట్టుగానే ఈ విషయమై బుధవారం జిల్లా కలెక్టరేట్‌లో కలెక్టర్ సమక్షంలో ఆర్డీవీ, డీఎస్పీ, తహసీల్దార్‌లను పిలిపించి బాధితుల సమస్యను అడిగి తెలుసుకున్నారు. వారు చెప్పిందంతా విన్న మంత్రి.. ఇప్పటి వరకూ తనకు మీ సమస్య గురించి తెలియదన్నారు. వెంకటేష్ కుటుంబానికి భూమి అమ్మిన వ్యక్తి.. అదే భూమిని మరొకరికి విక్రయించాడని మంత్రి తెలుసుకున్నారు. దీంతో భూమిని విక్రయించిన వ్యక్తిపై చీటింగ్ కేసు నమోదు చేయాలని డీఎస్పీ శ్రీధర్‌ను ఆదేశించారు. బాధిత కుటుంబానికి న్యాయంగా రావాల్సిన భూమిని నూరు శాతం తప్పకుండా ఇప్పిస్తామని, పూర్తి అండగా ఉంటామని మంత్రి భరోసా ఇచ్చారు.

ఈ సందర్బంగా మంత్రి మాట్లాడుతూ... పేదలకు అండగా ఉండటం కోసమే తాను మహబూబ్‌నగర్‌ను ఎంచుకున్నానని తెలిపారు. తాను ప్రాతినిధ్యం వహిస్తున్న చోట ఎవరైనా పేదలకు అన్యాయం చేస్తే సహించేది లేదన్నారు. ఎంతటివారైనా వారిని వదిలి పెట్టబోమని హెచ్చరించారు. కేటీఆర్ కాన్వాయ్‌కు అడ్డుపడిన వెంకటేష్‌ది నిరుపేద కుటుంబమని మంత్రి తెలిపారు. పేదలను మోసం చేస్తే సహించబోమని హెచ్చరించారు. వెంకటేష్ కుటుంబానికి భూమిని తిరిగి ఇప్పించాలని కలెక్టర్‌ను ఆదేశించారు.

ఈ మొత్తం వ్యవహారంపై విచారణ చేపట్టాలని అదనపు కలెక్టర్ సీతారామ రావును ఆదేశించినట్లు మంత్రి శ్రీనివాస్ గౌడ్ తెలిపారు. పేదల సంక్షేమానికి తమ ప్రభుత్వం ప్రాధాన్యం ఇస్తుందన్నారు.